Ve. Bambangi ya Yehowa ke buyaka ve kubaka mangwele (Vaccin). Kubaka mangwele kele lukanu ya me tala Mbangi ya Yehowa mosi-mosi. Bampangi mingi me baka lukanu ya kubaka mangwele.

 Beto ke sosaka kubaka lusansu ya mbote mpi beto ke sepelaka mingi na kumona mutindu mambu ya me tala kimunganga ke kwenda na ntwala sambu maladi mosi buna kukuma ve ngolo mingi. Beto ke pesaka mersi na minganga mutindu bo ke kudipesaka ya mvimba mpi sambu na kisalu na bo ya ngolo, mingi-mingi ntangu maladi mosi ke niokula bantu mingi.

 Beto ke salaka diboko na diboko ti bamfumu yina ke talaka mambu ya sante. Mu mbandu, banda maladi ya COVID-19 yai me panzana na ntoto ya mvimba yantikaka, beto me basisa dezia na site Internet na beto mpi na bandinga mingi kibeni masolo mpi bavideo yina monisaka nde kuzitisa bansiku yina bamfumu me tula sambu maladi yango kupanzana ve kele kibeni mfunu. Masolo mpi bavideo yango vandaka kulomba bantu na kulemfuka na bansiku yina bamfumu me tula na yina me tala kuvukana kisika mosi, kutula muntu yina me baka maladi na kisika na yandi mosi (quarantaine), kuyobisa maboko, mpi kulwata maske. Diaka masolo mpi bavideo yango vandaka kulomba bantu na kuzitisa mpi bansiku ya nkaka yina bamfumu pesaka.—Baroma 13:1, 2.

 Banda ntama, mikanda na beto ke sadisaka bantu na kuyibuka mambu yai ya kele na Biblia:

•   Lukanu na mambu ya sante me tala muntu yandi mosi.—Bagalatia 6:5.

   “Zulunalu yai ke lombaka ve bantu na kundima kubaka nkisi to lusansu mosi buna na kisika ya lusansu ya nkaka, mpi yo ke pesaka ve bandongisila na mambu ya me tala kimunganga. Yo ke tubilaka kaka mambu mutindu yo kele mpi yo ke bikaka nde muntu ya ke tanga yo kuvanda ti ngindu mpi kubaka lukanu na yandi.”—Telama!, Februari 8, 1987 ya Kifalansa.

   “Lukanu na yina me tala kana nge to bantu ya dibuta na nge ta baka mangwele to ve kele lukanu na nge mosi to ya bantu ya dibuta na nge bo mosi.”—Telama!, Augusti 8, 1993 ya Kifalansa.

•   Beto ke bakaka lusansu sambu beto ke zabaka nde luzingu kele mfunu mingi.—Bisalu 17:28.

   “Bambangi ya Yehowa ke landaka lusansu ya minganga sambu bo beluka na maladi yina bo ke bela. Bo ke zolaka luzingu. Bo ke salaka mpi yonso yina bo lenda sala kansi ya ke fwaka ve bansiku ya Nzambi yina kele na Biblia sambu na kulanda kuvanda na luzingu.”—Nzozulu ya Nkengi, Oktobri 1, 1975 ya Kifalansa.

   “Bambangi ya Yehowa ke ndimaka na luzolo yonso nde bo sansa bo. Bo ke zolaka nde bo vanda kaka na sante ya mbote mpi bo zinga mingi. Nkutu, kaka bonso Luka, Mukristu yina ya zingaka na mvu-nkama ya ntete, Bambangi ya nkaka ya Yehowa kele badoktere. Bambangi ya Yehowa ke zabaka mbote nde bantu yina ke sansaka bantu ke salaka kisalu ya ngolo mpi bo ke kudipesaka kibeni na kisalu na bo. Bo ke pesaka mpi bantu yina ke sadisaka bo na kuvanda ti sante ya mbote mersi.”—Nzozulu ya Nkengi, Februari 1, 2011 ya Kifalansa.