Beto ke buyaka ve bantu yina vandaka ntete Bambangi ya Yehowa, bayina ke longaka diaka ve mpi ke vukanaka diaka ve ti beto. Kansi, beto ke sosaka bo mpi ke sadisaka bo na kuvutukila diaka mambu ya kimpeve.

 Beto ke basisaka ve mbala mosi muntu yina me sala disumu ya nene na dibundu. Kansi, kana Mbangi mosi ya Yehowa ke zitisa diaka ve bansiku ya Biblia mpi me balula ve ntima, bo ta basisa yandi na dibundu. Biblia ke tuba pwelele nde: “Beno katula muntu ya mbi na kati na beno.”​—1 Bakorinto 5:13.

 Inki ta salama kana muntu yina bo me basisa na dibundu kele ti nkento mpi bana yina kele kaka Bambangi ya Yehowa? Yandi lenda solula mambu ya nkaka ti bantu ya dibuta na yandi kansi yandi lenda solula ve mambu ya kimpeve ti bo.

 Bantu yina bo me basisa na dibundu lenda kwisa na balukutakanu na beto. Kana bo me zola, bankuluntu ya dibundu lenda pesa bo bandongisila ya me katuka na Biblia. Lukanu ya bankuluntu kele ya kusadisa bo na kuvutuka na dibundu. Kana bantu yina bo me basisa na dibundu me yambula bikalulu na bo ya mbi mpi me monisa mpusa ya masonga ya kuzinga na kuwakana ti bansiku ya Biblia; bo lenda vutuka diaka na dibundu.