Ve. Beto Bambangi ya Yehowa, beto ke pesaka ve dikumi. Mbongo ya beto ke sadilaka kisalu na beto ke katukaka na makabu ya luzolo ya mbote. Dikumi kele nki? Sambu na nki Bambangi ya Yehowa ke pesaka yo ve?

 Nsiku ya kupesa dikumi to makabu ya ndambu ya kumi ya bima yina muntu kele ti yo vandaka na kati ya Nsiku yina Nzambi pesaka dikanda ya Izraele ya ntama. Kansi, Biblia ke monisa pwelele nde Nsiku yai, yo vanda “nsiku ya kubaka dikumi” ke tadila ve Bakristu.​—Baebreo 7:5, 18; Bakolosai 2:13, 14.

 Na kisika ya kupesa dikumi mpi makabu sambu bo ke pusa bo na kusala yo, Bambangi ya Yehowa ke landaka mbandu ya Bakristu ya ntete mpi ke pesaka maboko na kisalu na bo ya kulonga na mitindu zole: bo ke longaka bantu kukonda kulomba bo mbongo mpi bo ke pesaka makabu ya luzolo ya mbote.

 Yo yina, beto ke landaka lutwadisu yina Biblia ke pesa na Bakristu nde: “Konso muntu kusala mutindu yandi me kana na ntima na yandi, ti kubokuta ve to sambu bo ke pusa yandi, sambu Nzambi ke zolaka muntu yina ke pesaka na kiese.”​—2 Bakorinto 9:7.