Ee. Mbala mingi Bambangi ya Yehowa ke sadisaka bantu kana kisumbula me salama. Beto ke sadisaka bantu na kinsuni, yo vanda bayina kele Bambangi to ve, na kuwakana ti mambu yai Biblia ke tuba na mukanda ya Bagalatia 6:10: “Beto sala mambu ya mbote na bantu yonso, kansi mingi-mingi na bantu yina kele bampangi na beto na lukwikilu.” Beto ke pesaka mpi bantu yina me bwila kisumbula lusadisu ya kimpeve mpi kikesa na ntangu yina ya mpasi.​—2 Bakorinto 1:3, 4.

 Kana kisumbula me salama, bankuluntu ya mabundu ya kele na kisika yina kisumbula me salama ke salaka bikesa sambu na kuzaba kana bampangi yonso ya mabundu yina kele mbote mpi ke sosaka kuzaba lusadisu yina bo kele na yo mfunu. Na nima, bankuluntu yina ke zabisaka biro ya filiale ya Bambangi ya Yehowa ya bwala na bo mambu ya bo me mona mpi lusadisu yina bo me pesa

 Kana mabundu ya bwala yina kisumbula me salama ke kuka ve kupesa lusadisu yina bampangi kele na yo mfunu, Nto-Kimvuka ya Bambangi ya Yehowa ke bakaka bangidika sambu na kupesa lusadisu yina bampangi kele na yo mfunu. Kusala mutindu yina me fwanana ti mutindu Bakristu ya mvu-nkama ya ntete vandaka kusadisana na nsungi ya nzala. (1 Bakorinto 16:1-4) Biro ya filiale ya bwala yina kisumbula me salama ke lombaka Bakomite ya Ke Pesaka Lusadisu na Bantu Yina Me Bwila Mpasi na kubaka bangidika mpi kutwadisa kisalu yango. Bambangi ya Yehowa ya babwala ya nkaka ke sadilaka na luzolo yonso ntangu na bo mpi ke pesaka bima na bo sambu na kusadisa bampangi.​—Bingana 17:17.

 Bo ke sadilaka mbongo yina bo ke tindaka na babiro ya filiale ya Bambangi ya Yehowa sambu na kusadila mambu mingi mu mbandu, kusadisa bantu yina me bwila mpasi. (Bisalu 11:27-30; 2 Bakorinto 8:13-15) Bampangi ya luzolo ya mbote bantu ke salaka kisalu yina mpi bo ke futaka bo ve. Yo yina, bo ke sadilaka mbongo yina bampangi ke pesaka sambu na kusadisa bantu yina me bwila mpasi kansi ve sambu na mambu ya nkaka. Beto ke salaka yonso sambu beto sadila ve mbongo yina na mutindu ya mbi.​—2 Bakorinto 8:20.