Bambangi ya Yehowa ke zolaka Nzambi mpi bantu yina ke zingaka bakartie mosi ti bo. Yo yina bo ke sepelaka kusonga bantu yonso nsangu yina kele na Biblia, yo vanda bayina tubaka nde “Mono ke sepelaka ve ti mambu na beno.” (Matayo 22:37-39) Beto ke zolaka Nzambi, yo yina beto ke zitisaka nsiku yai ya mwana na yandi pesaka ya “kuta kimbangi mbote-mbote.” (Bisalu 10:42; 1 Yoane 5:3) Sambu na kusala kisalu yina, beto ke vutukilaka bantu mbala na mbala sambu na kunatila bo nsangu ya Nzambi kaka mutindu baprofete ya ntangu ya ntama salaka. (Yeremia 25:4) Mutindu beto ke zolaka bantu yina beto ke zingaka ti bo kisika mosi, beto ke salaka yonso sambu na kulonga bo yonso “nsangu ya mbote ya Kimfumu,” yo vanda bayina buyaka kuwa yo na mbala ya ntete.—Matayo 24:14.

 Mbala mingi, beto ke kutanaka ti bantu yina ke sepelaka kuwa nsangu na beto na ntangu beto ke vutukaka na banzo yina bantu sepelaka ve ti yo na mbala ya ntete. Beto tadila bikuma tatu:

•   Bantu ke katukaka mpi ke kwendaka bisika ya nkaka.

•   Bantu ya nkaka ya nzo ke sepelaka ti nsangu na beto.

•   Bantu ke sobaka. Mambu ya ke salamaka na ntoto to mambu yina muntu me kutana ti yo ke pusaka bantu ya nkaka na ‘kubakisa mbote-mbote nde bo kele ti nzala ya mambu ya kimpeve” mpi na kusepela ti nsangu ya kele na Biblia. (Matayo 5:3) Yo vanda bayina ke teleminaka beto, bo lenda balula ntima kaka mutindu ntumwa Polo salaka.—1 Timoteo 1:13.

 Ata mpidina, beto ke pusaka ve bantu na kundima nsangu na beto. (1 Piere 3:15) Beto me zaba nde konso muntu fwete baka yandi mosi lukanu na yina me tala mambu ya lusambu.—Kulonga 30:19, 20.