Ntangu nkento mosi ya Ukraine waka mpangi Stephen Lett ya Nto-Kimvuka ya Bambangi ya Yehowa ke tanga mukanda mosi ya mfunu, yandi tubaka nde: “Beto kudiwaka bonso nde bo me monisila beto zola mingi kibeni!” Yandi vandaka na kati ya Bambangi 165000 yina waka diskure ya mpangi Lett ntangu yandi kwendaka kutala bwala yina na wikendi ya Mayi 10 mpi 11, 2014.

Yandi salaka badiskure ya me simbama na Biblia mpi tangaka mukanda mosi; bo vandaka kubalula yo na bandinga tanu mpi bampangi landaka yo na Banzo ya Kimfumu kiteso ya 700 na Ukraine.

Kaka na wikendi yina, Mpangi Mark Sanderson, yina kele mpi mpangi ya Nto-Kimvuka, tangaka mukanda yina mosi na lukutakanu yina bo salaka sambu na bampangi na beto ya Russie. Bo balulaka lukutakanu yina na bandinga 14, mpi bampangi 180413 ya mabundu kuluta 2500 ya Biélorussie mpi ya Russie landaka manaka yina.

Mukanda ya bo tangaka, yina katukaka na Nto-Kimvuka, bo sonikaka yo sambu na mabundu yonso ya Russie mpi ya Ukraine. Mpangi Sanderson tangaka yo na ndinga ya Russie, mpi yo pusaka biro ya filiale ya Russie na kusonika nde: “Yo me simba mpenza ntima ya bampangi na kumona nde Nto-Kimvuka ke tulaka dikebi mingi na kitini yai nsi-ntoto. Beto yonso kudiwaka bonso nde Nto-Kimvuka me baka beto na maboko.”

Bo sonikaka mukanda yina sambu na kulembika mpi kupesa kikesa na Bambangi yina vandaka na bisika yina mavwanga ya politiki kele. Yo siamisaka bampangi na kulanda kuvanda ve “bantu ya nsi-ntoto” mpi na kukota ve na mambu ya politiki ya nsi-ntoto.—Yoane 17:16.

Yo yina, Nto-Kimvuka siamisaka Bampangi na kulanda kuvanda ti bangwisana ya ngolo ti Yehowa na nzila ya kisambu, ya kulonguka, mpi ya kuyindulula Ndinga ya Nzambi. Bo yibusaka bawi nde ata bo kutana ti mpasi ya nki mutindu, bo lenda tula ntima nde lusilu yai ya Nzambi yina kele na Yezaya 54:17 ta lungana kibeni: “Ata kinwaninu mosi ve ya bo ta sadila sambu na kunwanisa nge ta nunga.”

Nto-Kimvuka sukisaka mukanda na bo ti bangogo yai: “Beto ke zolaka beno yonso mingi kibeni. Beno zaba nde, beto ke yindulaka beno ntangu yonso mpi beto ke sambaka Yehowa sambu na mambote na beno.”

Biro ya filiale ya Bambangi ya Yehowa ya Ukraine sonikaka mambu yai sambu na viziti yina: “Bampangi sepelaka mingi sambu na zola mpi dikebi yina Nto-Kimvuka tudilaka bo. Mutindu mpangi Lett mpi Sanderson kwisaka na Ukraine mpi na Russie kaka na wikendi mosi kele nzikisa ya pwelele ya ke monisa bumosi ya bantu ya Nzambi mpi yo monisaka bampangi nde Yehowa ti Yezu ke kudibanzaka sambu na bo. Beto yonso ndimaka nde bo salaka viziti yina na ntangu ya mbote, mpi beto me baka kikesa ya kulanda kusadila Yehowa ata beto kutana ti konso mpasi yina.”