Na mvu 2014, Nto-Kimvuka ya Bambangi ya Yehowa salaka manaka ya mpa sambu Bambangi ya Yehowa kukwenda kulonga nsangu ya Biblia na babwala yina kele ntama na nordi ya Eropa mpi ya Amerika. (Bisalu 1:8) Na luyantiku, manaka yina vandaka kutadila kaka bantu yina ke zingaka na Alaska (Etats-Unis), na Laponie (Finlande), na Nunavut mpi na babwala yina kele na Nordi-Westi (Canada).

Banda ntama Bambangi ya Yehowa ke kwendaka kulonga na babwala yina. Kansi, bo vandaka ve kusala bilumbu mingi mpi mbala mingi bo vandaka kukabula kaka mikanda yina ke tendulaka Biblia.

Sambu na kulanda manaka yai ya mpa, babiro ya filiale yina ke talaka kisalu ya Bambangi ya Yehowa na babwala yina kele ntama na nordi lombaka Bambangi ya Yehowa yina ke salaka kisalu ya ntangu yonso (bapasudi-nzila) na kusala bangonda tatu na babwala yina. Kana bantu yina ke zingaka kuna me sepela kulonguka Biblia, bampangi yai lenda bikala bilumbu mingi kuna mpi kuyantika kusala balukutakanu sambu na bantu yonso.

Ya kieleka, babwala yina kele na Nordi ke vandaka mpi ti bampasi na yo. Bo tindaka bampangi-babakala zole na Barrow (Alaska). Bo vandaka bapasudi-nzila. Mupasudi-nzila mosi vandaka ntete kuzinga na sudi ya Californie kansi yina ya nkaka na Géorgie (Etats-Unis). Na nsungi na bo ya ntete ya madidi na Barrow, bwala yai vandaka kibeni madidi, madidi yina vandaka tii na nsi ya 38° C. Kansi bangonda fioti na nima, bo kwendaka kutala kiteso ya bantu 95 na kati ya nkama ya kele na bwala yina mpi bo yantikaka kulonguka Biblia ti bantu iya; toko mosi ya bakala vandaka na kati ya bantu yina bo vandaka kulonguka ti bo. Zina na yandi John. Toko yai ti nduku na yandi ya nkento ke longukaka mukanda Inki Biblia Kelongaka Mpenza? mpi toko yai ke zabisaka banduku na yandi mpi bantu yina yandi ke salaka ti bo mambu yina yandi ke longukaka. Yandi ke tangaka mpi mukapu ya lumbu na kamukanda Beto Fimpa Masonuku Konso Kilumbu na nzila ya JW Library na telefone na yandi.

Yo ke vandaka ve ti nzila sambu na kukwenda na Rankin Inlet na teritware ya Nunavut na insi Canada. Yo yina bapasudi-nzila zole kwendaka na avio na kabwala yina mpi bo yantikaka kulonguka Biblia ti bantu mingi. Muntu mosi talaka video Que se passe t-il dans une salle du Royaume ?, na nima yandi yulaka kilumbu yina beto ta tunga Nzo ya Kimfumu na bwala yina. Yandi tubaka diaka nde, “Ntangu beno ta tunga yo, mono ta kwisa na balukutakanu kana mono kele kaka awa.”

Bapasudi-nzila yina bo tindaka na Savokoski (Finlande) ke tuba nde: “Madidi ti neze ke vandaka mingi.” Na bwala yai, bambambi kele mingi kuluta bantu. Kansi, bapasudi-nzila yai ke tuba nde bo kumaka na ntangu ya mbote. Sambu na nki? Bo ke tuba nde: “Beto longaka na babwala yonso. Banzila yina ke kwendaka na babwala mpi na bisika ya ntama vandaka ya kuyidika mbote. Madidi vandaka mingi, yo vandaka kusala nde bantu kubikala na banzo.”

Bikesa yina beto salaka sambu na kulonguka Biblia ti bantu ya ke zingaka ntama na nordi bendaka dikebi ya bantu. Ntangu bapasudi-nzila zole kwendaka kutala mfumu ya mbanza mosi ya Alaska (mfumu yango vandaka nkento), yandi sonikaka mambu ya mbote yina yandi solulaka ti Bambangi yina mpi yandi tulaka yo na site Internet mosi. Yandi tulaka mpi trakiti Kimfumu ya Nzambi Kele Nki?

Na Haines (Alaska), bapasudi-nzila zole bingaka bantu nana na lukutakanu yina bo salaka na biblioteke ya bantu yonso. Zulunalu ya bwala yina tubaka nde bantu zole yina katukaka na Texas mpi na Nordi ya Caroline kwisaka na mbanza sambu na kulonga muntu mosi-mosi Biblia na nzo na yandi. Na nsuka zulunalu yina tubaka nde: “Sambu na kuzaba mambu mingi, beno kota na jw. org.”