Na insi Estonie, bo ponaka Biblia—Mbalula ya Nsi-Ntoto ya Mpa na ndinga ya Estonie sambu na kufwanisa yo ti mikanda ya nkaka yina basikaka na ndinga ya Estonie na mvu 2014. Na kati ya mikanda 18 yina bo ponaka, Biblia—Mbalula ya Nsi-Ntoto ya Mpa bakaka kisika ya tatu ntangu bo manisaka kupona mikanda.

Kristiina Ross kele nkento mosi ya ke longukaka bandinga. Yandi ke longaka na Nzo-Nkanda ya Nene yina ke longaka bandinga na insi Estonie. Yandi muntu ponaka Mbalula yai ya mpa ya Biblia, yina basikaka na Augusti 8, 2014 sambu na kufwanisa yo ti mikanda ya nkaka. Yandi tubaka nde Biblia—Mbalula ya Nsi-Ntoto ya Mpa kele ve “mpasi na kutanga mpi kutanga yo kele kitoko.” Yandi tubaka diaka nde: “Kisalu yina bo salaka sambu na kubalula Mbalula yai me sala kibeni nde kisalu ya kubalula mikanda na ndinga ya Estonie kukwenda na ntwala.” Rein Veidemann, profesere mosi na Estonie ke longaka mambu ya me tala mikanda mpi mutindu bantu ke zingaka. Yandi bingaka mbalula yai ya mpa “kima mosi ya nene.”

Mbalula ya ntete ya Biblia ya mvimba na Estonie basikaka na mvu 1739, mpi banda mvula yina bo me basisaka bambalula ya nkaka. Kansi sambu na nki bo ke tuba nde Mbalula ya Nsi-Ntoto ya Mpa kele “kima mosi ya nene”?

Siki-Siki. Biblia mosi na ndinga ya Estonie yina bo basisaka na mvu 1988 mpi yina bantu mingi ke sadilaka me balulaka zina ya Nzambi “Jehoova” (Yehowa) mbala kuluta 6800 na Masonuku ya Kiebreo (Kuwakana ya Ntama). a Mbalula ya Nsi-Ntoto ya Mpa na ndinga ya Estonie me sala yo mbala mingi kuluta. Bisika yina yo lombaka nde bo sala mutindu yina, Mbalula ya Nsi-Ntoto ya Mpa me sadila mpi zina ya Nzambi na Masonuku ya Kigreki ya Bukristu (Kuwakana ya Mpa).

Pwelele. Keti Mbalula ya Nsi-Ntoto ya Mpa kele mbalula mosi ya siki-siki mpi ya pete na kutanga? Toomas Paul, mbaludi mosi ya Biblia yina bantu mingi ke zitisaka sonikaka na zulunalu mosi Eesti Kirik (Nzo-nzambi ya Estonie) sambu na Mbalula ya Nsi-Ntoto ya Mpa nde “mbalula yai me lungisa kibeni lukanu ya kubalula mikanda na ndinga ya Estonie sambu yo kele ve mpasi na kutanga.” Yandi tubaka diaka nde: “Mono ke songa beno nde yai mbala ya ntete ya bo me lungisa lukanu yai.”

Mambu yina bantu ya Estonie tubaka sambu na Mbalula ya Nsi-Ntoto ya Mpa ke yitukisa kibeni. Radio mosi ya Estonie salaka emisio mosi ya minuta 40 sambu na kutubila kaka Biblia yai ya mpa. Bamfumu ya mabundu mpi bantu yina ke kwendaka na nzo-nzambi sonikilaka Bambangi ya Yehowa to bingaka bo sambu na kulomba bo Biblia yina. Ekole mosi ya kuluta mbote na Tallinn lombaka ba Biblia Mbalula ya Nsi-Ntoto ya Mpa 20 sambu na kulonga yo na mosi na kati ya malongi yina bo ke longaka. Bantu ya Estonie ke zolaka mikanda mingi, mpi Bambangi ya Yehowa kele na kiese ya kubasisa mbalula mosi ya kele siki-siki mpi pwelele. Yo kele mukanda mosi ya mbote kuluta.