Konso mvula, Bambangi ya Yehowa ke basisaka bavideo yina bo ke songaka na balukutakanu na bo ya distrike. Bavideo mingi ke salamaka na Kingelesi. Inki mutindu bantu yina ke kwisaka na balukutakanu ya distrike ke bakisaka bavideo yango na bandinga na bo? Bampangi yina ke salaka na stidio ke salaka doublage. Disongidila, bo ke bakaka bande de son ya ndinga yina bo ke balula mpi ke tulaka yo na kisika ya bande de son ya Kingelesi. Na kutuba ya nkaka, bo ke yikaka bande de son ya mpa na bavideo yina. Inki mutindu bantu yina ke kwisaka na balukutakanu ya distrike ke kudiwaka ntangu bo ke talaka bavideo yango?

Wa mambu yina bantu yina kele ve Bambangi ya Yehowa tubaka na nima ya kutala bavideo ya ndinga na bo na lukutakanu ya distrike yina salamaka na Mexique mpi na Amérique centrale:

• “Mu bakisaka mpenza filme yina mpi yo vandaka bonso nde mu vandaka kibeni ntangu yo vandaka kusalama. Yo simbaka kibeni ntima na mono.”​—Muntu mosi yina vandaka na lukutakanu ya distrike yina salamaka na ndinga Popoluca na mbanza Veracruz, na insi Mexique.

• “Mu kudiwaka bonso mu ke na bwala na beto mpi mu ke sololula ti nduku na mono. Yo vandaka kitoko mingi kuluta bafilme sambu mono bakisaka mambu yonso.”​—Muntu mosi yina vandaka na lukutakanu ya distrike yina salamaka na ndinga Nahuatl na mbanza Nuevo León, na insi Mexique.

• “Ntangu mono monaka bavideo yina na ndinga na beto, mu kudiwaka bonso nde bantu yina vandaka na filme vandaka kutubila mono mpenza.”​—Muntu mosi yina vandaka na lukutakanu ya distrike yina salamaka na ndinga Chol na mbanza Tabasco, na insi Mexique.

• “Organizasio yai ke salaka nyonso sambu na kulonga bantu na ndinga na bo. Kele ve ti organizasio ya nkaka ya me fwanana ti yo!”​—Muntu mosi yina vandaka na lukutakanu ya distrike yina salamaka na ndinga Cakchiquel na mbanza Sololá, na Guatémala.

Bambangi ya Yehowa ke sadilaka ve bantu yina ke salaka na bastidio sambu na kukotisa bandinga to bantu yina ke salaka bafilme mbote-mbote sambu na kusala bavideo yai. Diaka, mbala mingi bo ke kotisaka bandinga na babwala yina kele ntama kibeni mpi babwala yango ke vandaka ve ti bima ya kufwana sambu na kusala bafilme yai. Ebuna, inki mutindu bo ke nungaka na kusala bavideo ya kitoko?

Na mvu 2016, biro ya filiale ya Bambangi ya Yehowa ya Amérique centrale twadisaka kisalu ya kubalula bavideo mpi kukotisa bandinga na Kiespagnole mpi na bandinga-bwala 38. Bampangi kuluta 2500 pesaka maboko na luzolo yonso. Bampangi yina ke salaka na stidio mpi bimvuka ya bambaludi kotisaka bandinga ya bavideo yango na Betele, na babiro ya bo ke balulaka mikanda to na bisika ya nkaka yina bo tulaka ba stidio sambu na mwa ntangu. Na kimvuka, bo kotisaka bandinga na bisika kuluta 20 na bansi yai: Bélize, Guatémala, Honduras, Mexique, mpi Panama.

Yo lombaka kisalu ya ngolo mpi mayele sambu na kuyidika ba stidio yina bo salaka sambu na ntangu fioti. Bo sadilaka bima yina bo vandaka ti yo na bisika yina sambu makelele kukota ve; mu mbandu bamuse mpi ba kuvertire.

Bampangi mingi yina kotisaka bandinga ya bwala na bavideo yina vandaka ve ti mbongo mingi. Bo salaka bibansa ya ngolo sambu na kusala banzietelo tii na ba stidio ya pene-pene. Bankaka salaka nzietelo ya bangunga 14! Mu mbandu, papa mosi ti mwana na yandi ya bakala tambulaka bangunga 8.

Ntangu Naomi vandaka leke, yandi ti dibuta na yandi vandaka kupesa maboko na kusala ba stidio ya mwa ntangu fioti. Yandi ke yibuka mambu yango mpi ke tuba nde: “Beto vandaka kuvingila na kiese yonso mposo yina bampangi fwete kwisa sambu na kukotisa ndinga. Papa vandaka kusala ngolo sambu na kutwadisa mambu. Bantangu ya nkaka, mama vandaka kulamba madia sambu na bampangi 30 ya luzolo ya mbote.” Bubu yai, Naomi ke pesaka maboko na luzolo nyonso na biro mosi ya bambaludi na Mexique. Yandi ke tuba nde: “Mono kele na kiese ya kupesa ntangu na mono sambu na kusadisa bantu na kuwa nsangu ya Biblia na ndinga ya bwala na bo. Kisalu yai me luta bisalu yonso, sambu yo kele kisalu yina ke nataka balusakumunu mingi.”

Bambangi ya Yehowa ke salaka balukutakanu ya distrike konso mvula na ntoto ya mvimba mpi bantu yonso lenda kwisa na balukutakanu yango. Sambu na kuzaba mambu mingi tala lutiti BALUKUTAKANU YA DISTRIKE.