Na Mexique mpi na Amérique centrale, bambaludi kiteso ya 290 yina ke zingaka na bansi sambanu, ke balulaka mikanda ya ke tendulaka Biblia na bandinga kuluta 60. Sambu na nki kusala kisalu yai? Sambu ntangu bantu ke bakaka mikanda na bandinga yina bo ke bakisaka mbote, yo ke simbaka bantima na bo.—1 Bakorinto 14:9.

Sambu na kutomisa kisalu ya kubalula mikanda, bambaludi ya nkaka yina vandaka kusala na biro ya filiale ya Bambangi ya Yehowa na Mbanza Mexique, bo me tindaka bo na bisika yina bantu ke tubaka bandinga na bo. Inki mutindu yo me sadisaka? Bambaludi ke kukutanaka mingi ti bantu yina ke tubaka banda bumwana bandinga yina bo ke balulaka mikanda, ebuna yo ke sadisaka bo na kubalula mikanda na mutindu yina bantu lenda bakisa kukonda mpasi.

Bambaludi ke yindula nki sambu na nsoba yai? Federico yina ke balulaka na Nahuatl ya Guerrero ke tuba mutindu yai: “Na bamvula kiteso ya kumi yina mono lutisaka na Mexique, mono monaka kaka dibuta mosi mpamba ya ke tubaka ndinga na mono. Kansi bubu yai, na bambanza yina kele pene-pene ya kisika beto ke balulaka mikanda, bantu yonso ke tubaka ndinga yina!”

Karin, yina ke balulaka mikanda na ndinga ya Kialema ya nsi na biro ya kubalula mikanda yina kele na mbanza Chihuahua na Mexique, ke tuba nde: “Kuzinga kisika mosi ti ba mennonite (bantu yina ke tubaka ndinga ya Kialema ya nsi) me sadisaka mono na kuzaba mutindu bantu ke tubaka kilumbu yai. Beto ke zingaka mpi ke salaka kisalu na mbanza mosi ya fioti, mpi ntangu mono ke talaka na fenetre, mono ke monaka bantu yina ta baka mambote ya kisalu na beto.”

Neyfi, yina ke zingaka ntangu yai na biro ya bo ke balulaka mikanda na Merida, na Mexique, ke tuba nde: “Ntangu beto ke longukaka Biblia ti bantu na ndinga ya Maya, beto ke monaka bangogo yina bantu ya ke tubaka Maya ke bakisaka ve mbote. Yo yina, beto ke sosaka mitindu ya mbote ya kubalula bangogo yina.”

Inki mutindu bantu yina ke bakaka mikanda yina bo ke balulaka ke bakilaka yo mambote? Beto tadila mbandu kaka mosi: Na kiteso ya bamvula 40, Elena yina ke tubaka ndinga ya Kitlapanec, vandaka kukwenda mbala na mbala na balukutakanu ya Bambangi ya Yehowa. Kansi sambu balukutakanu vandaka na Kiespaniole, yandi vandaka kubakisa ve mambu yina bo vandaka kutuba. Yandi ke tuba nde, “Mu vandaka kuzaba nde mu fwete kwenda na balukutakanu.” Kansi, ntangu Elena longukaka Biblia na nsadisa ya tumikanda ya Kitlapanec, yandi kumaka kuzola Nzambi mingi yo yina yandi kudipesaka na Nzambi mpi bakaka mbotika na 2013. Elena ke tuba nde, “Mu ke pesa Yehowa matondo mutindu yandi me pesa mono nzila ya kubakisa Biblia.”