Na nima ya mvula ngolo yina nokaka na nordi ya Italie na Novembri 2016, babwala mingi na sudi ya mbanza Moncalieri fulukaka ti masa. Na bisika ya nkaka, masa kumaka pene-pene ya metre mosi. Zulunalu mosi tubaka nde: “Masa bebisaka ve ata kima mosi.” Bamfumu bakaka bangidika nswalu sambu na kubasisa bantu 1500 na kisika yina kigonsa vandaka mpi na nsadisa ya ekipi yina ke gulusaka bantu na masa, kima mosi ve ya mbi salamaka. Ata mpidina mabuta mingi vidisaka bima na bo mingi.

Bimvuka ya Bambangi ya Yehowa ya bwala yina salaka kisalu kukonda kusukinina. Bo katulaka poto-poto mpi mvindu yina vandaka na kati ya banzo ya bantu yina banzo na bo bebaka mpi bo pesaka bo bisadilu ya nkaka. Nzila vandaka ya kukanga ntangu bampangi vandaka kunata bima mpi madia, kansi bamfumu pesa bo nswa na kuluta sambu na kusadisa dibuta mosi ya vandaka ti mfunu ya lusadisu. Bampangi sadisaka Bambangi ya Yehowa ya bwala yina mpi bantu ya mabundu ya nkaka.

Mu mbandu, magazini mosi yina vandaka na nzo ya etazi fulukaka ti masa. Ntangu bantu yina ke basisaka masa kwisaka kubasisa masa na nzo yina, kaka na ntangu yina, kimvuka ya Bambangi ya Yehowa vandaka kusadisa mpangi Antonio mpi dibuta na yandi na kubasisa mvindu na magazini na bo. Na nima, Bambangi ya Yehowa sadisaka mpi bantu ya nkaka yina vandaka kuzinga na nzo yango. Bo tulaka ndonga sambu na kubasisa bima yonso na nzo yina kaka na ntangu fioti. Bantu yonso sepelaka ti lusadisu na bo. Viviana, nkento yina vandaka kuzinga na nzo yango, songaka nkento ya Antonio nde: “Pesila mono bampangi na beno matondo sambu na kisalu na bo, yo vandaka mbote kibeni!”

Bantu ya bwala mosi yina masa fulukaka na bwala na bo, vandaka kutala mutindu Bambangi ya Yehowa vandaka kusadisa bantu yina kutanaka ti bampasi. Ntangu bo monaka mambu yai, bantu ya nkaka na kati na bo vukanaka ti Bambangi ya Yehowa sambu na kusala kisalu mpi bo vandaka na kiese ya kulanda bantuma yina bantwadisi vandaka kupesa.

Nzo ya muntu mosi bebaka mingi kibeni mpi garage na yandi fulukaka ti poto-poto. Yandi yitukaka na kumona mutindu Bambangi ya Yehowa nana salaka kisalu kukonda kupema na bangunga iya sambu na kukatula mvindu yina vandaka na garage na yandi. Sambu na kumonisa ntonda na yandi na bambangi ya Yehowa, yandi yambaka bo na kiese yonso mpi sonikaka ba mesage na internet sambu na kumonisa ntonda na yandi na “Lusadisu na bo ya me Fwana.”

Mbangi ya Yehowa mosi ke tuba nde: “Beto sadisaka Bantu mingi yina vandaka ve Bambangi ya Yehowa, mingi na kati na bo vandaka ti bamvula kiteso ya 80. Bankaka vandaka kudila na kiese yonso mpi pesaka beto mersi sambu na kisalu yina beto salaka.” Muntu mosi yina vandaka kusala mingi na nzo-nzambi ya katolika, monisaka na bambangi ya Yehowa mutindu yandi vandaka kusepela ti lusadisu na bo mpi yandi ke yika nde: “Mono kele na kiese mingi ya kumona nde ata balukwikilu na beto kele ya kuswaswana, beto ke sadisanaka.” Muntu ya nkaka tubaka nde: “Beno lolula mono, sambu beto vandaka kuyindula nde beno ke bingisaka kaka bantu na balukutakanu na beno konso lumingu na suka. Kansi ve bonso bantu yina ke sadisaka bantu ya nkaka.”