Bo me pesaka Bambangi ya Yehowa 9 ya Australie maplome sambu bo ke sadilaka banzenza yina vandaka na boloko “bisalu ya mbote kibeni” na kisika mosi ya nene na Australie yina bo ke tulaka bantu ya me katuka na bansi ya nkaka na boloko. Santre ya rétetion d’immigrants ya Curtin ya kele pene-pene ya Derby, na Westi ya Australie, kupesaka maplome yai na Bambangi ya Yehowa. a

Konso mposo, Bambangi yina ke kwendaka kutala bantu ya boloko sambu na kuwa mambu ya bo ke kutana ti yo mpi kuzabisa bo nsangu ya Biblia yina ke bwisaka ntima mpi ke pesaka kivuvu. Christopher Riddoch, muntu yina ke talaka mambu ya lusambu mpi ya bangwisana ti bantu, tubaka nde: “Mambote ya viziti na bo ke monanaka mbala mosi na bantu ya boloko.” Yandi tubaka nde nkadilu ya bantu ya boloko ke tomaka mpi nde bo ke vandaka na kiese mingi na nima ya baviziti yina, sambu bo “ke zabaka nde na nganda kele ti bantu yina ke tudilaka bo dikebi ya masonga.”

Riddoch tubaka diaka nde maplome yina kele kaka kidimbu ya fioti ya ntonda na bo sambu na Bambangi yina ya “me tomisaka luzingu ya bantu yina beto ke kebaka.” Yandi yikaka nde Bambangi yina “ke pesaka lukumu na mabuta na bo, na dibundu na bo, mpi na lukwikilu na bo.”