Na Mayi 20, 2015, mfumu ya Rostov-sur-le-Don, mbanza mosi ya nene ya kele na sudi ya Russie sonikilaka Bambangi ya Yehowa mukanda sambu na kumonisa ntonda. Yandi sikisaka bo “sambu na kisalu ya ngolo yina bo salaka na nsungi ya mvula sambu na kukumisa mbanza yina kitoko.”

Ntangu bantu ya mbanza Rostov-sur-le-Don vandaka kusala bisalu sambu na kukumisa yo kitoko, Bambangi ya Yehowa ya mabundu iya lokutaka bima ya mvindu yina vandaka na banzila mpi na balweka ya banzadi. Na nima ya bangunga fioti mpamba, bo fulusaka basaki ya mvindu 300. Na nima, bakamio kwendaka kulosa yo.

Sambu na nki Bambangi vandaka ti mpusa ya ngolo ya kusadisa bantu? Raisa yina kele ti bamvula 67 ke tuba nde: “Mu fwe kanga ve maboko. Mu ke zola nde mbanza na beto kuvanda bunkete sambu bantu yonso kuzinga na kisika ya bunkete. Ata bantu fioti mpamba me zaba kisalu yina beto me sala, mu sepelaka na kisalu yango. Na kutuba ya mbote, Yehowa Nzambi monaka yo.” Aleksander ke yika nde: “Beto ke zabisaka ve bantu kaka nsangu ya mbote kansi beto ke sadisaka bo mpi. Mu ke waka kiese mingi kana mu ke sadisa bantu yina ke zingaka pene-pene ti mono.”

Bantu sepelaka mingi ti kikalulu ya Bambangi ya Yehowa ya kusadisa bantu na luzolo yonso. Muntu mosi ya mbanza yai yitukaka ntangu bo songaka yandi nde bo me futa ve Bambangi sambu na kisalu yina. Yandi bakaka lukanu ya kuvukana ti bo na kutula bunkete mpi na nima yandi tubaka nde: “Me yindulaka ntete ve nde mu lenda wa kiese na kusala kisalu ya kutula bunkete mpi kubakila yo mambote mingi!” Yandi ke yika nde: “Bankaka na kati na beno ke zingaka ve awa kansi beno me kwisa kutudila beto bunkete!”

Mfumu mosi ya mbanza tubaka nde ka kimvuka ya Bambangi lokutaka bima mingi kibeni ya mvindu. Yandi kangaka bo foto mpi basaki yina bo vandaka kufulusa mvindu sambu na “kusonga bantu ya nkaka mutindu bo fwete sala kisalu yina.”