Na ntoto ya mvimba, bantu ke baka mambote na site na beto jw.org. Tala mwa mambu yina bantu ya nkaka me sonika yantika na Mayi 2014, sambu na kupesa merci na biro ya nene ya ke twadisaka kisalu ya Bambangi ya Yehowa na ntoto ya mvimba.

“Mwana na beto ya fioti, vandaka ti kikalulu ya kuvutuka na nzo ti bima ya banduku na yandi, mu mbandu ba kreyo, bima ya kusakanina, mpi ata nkutu maneti ya banduku na yandi. Beto me kaka mbala mingi kusadisa yandi na kubakisa nde bo ke bingaka diambu yina muyibi mpi nde kuyiba kele mbi. Kansi mambu simbaka ve tii ntangu beto bakaka video ya jw.org Kuyiba Kele Mbi. Video yina vandaka kisadilu ya ngolo mpi kima yina mwana na beto vandaka kibeni na mfunu na yo. Na nima ya kutala yo, yandi monisaka mpusa ya kuvutula bima yina yonso, sambu ntangu yai yandi ke ndima nde kuyiba kele mbi na meso ya Nzambi. Site internet yai sadisaka beto mingi!”​—D. N., Afrika.

“Bana na mono ke zolaka site internet yai. Bo ke bakaka bavideo ya nkufi yina ke sadisaka bo na kusadila mbote minsiku ya Biblia ya ke tadila luvunu mpi kuyiba. Bo ke longukaka mpi bikalulu ya nkaka ya mfunu yina bo lenda sadila na luzingu na bo ya mvimba, ebuna yo ke salaka nde bo vandaka bantu ya mfunu na luzingu.”​—O. W., West Indies.

“Mono vandaka kumona nzo-nkanda bonso kizitu, mpi mono yindulaka nde mono fwete yambula yo. Kansi kilumbu mosi, mono tangaka disolo ya kele na ntu-diambu ‘Keti Mono Fwete Yambula Nzo-Nkanda?’ na site internet jw.org. Yo sadisaka mono na kutadila nzo-nkanda na mutindu ya mbote. Disolo yina sadisaka mono na kuzaba nde kukwenda na nzo-nkanda ta pesa mono formasio sambu na bilumbu ke kwisa mpi yo ta sadisa mono na kukuma muntu ya bo lenda tudila ntima.”​—N. F., Afrika.

“Bandongisila ya bo ke pesaka baleke na site internet yai me longaka mono mutindu ya kutanina bikalulu ya mbote na nzo-nkanda. Me longukaka mutindu ya kutula dikebi na kulonguka na mono mpi kubuya bima yina ke katulaka dikebi.”​—G., Afrika.

“Nduku mosi ya kisalu vandaka kubokuta nde, mwana-nkento mosi ya ke tangaka ti mwana na yandi ya nkento ke niokula yandi ngolo. Yo pusaka mwana ya nduku yai na kutina nzo-nkanda mwa bilumbu sambu yandi vandaka kuwa boma. Mono solulaka ti nduku na mono mpi monisaka yandi mambu yina kele na ka video yina kele na ntu-diambu Bula Muntu ya Ke Bangika Nge Kukonda Kusadila Makofi na Nge, yina kele na jw.org. Yandi sepelaka mingi na ndongisila ya kusadila mwa disolo to diambu ya ke sekisa sambu na kulembika mambu. Yandi solulaka ti mwana na yandi mpi monisaka yandi mambu ya yandi fwete sala kana bo me bangika yandi. Yo yina, mwana na yandi kwendaka na nzo-nkanda kukonda boma. Na nima, mambu sobaka, mpi mwana-nkento yina vandaka kubangika yandi, kumaka kusadila yandi mambu na mawete.”​—V. K., Eropa ya Esti.

“Mersi sambu na disolo ya kele na site internet yina kele na ntu-diambu ‘Sambu na Nki Mono Ke Kudizengaka?’ Mono ke nwanaka ti diambu yai banda ntama. Mono vandaka kuyindula nde mono mpamba muntu ke kutanaka ti yo mpi nde kana mono zabisa bantu ya nkaka, bo ta bakisa ve. Bambandu ya kele na disolo yina me sadisa mono mingi nde kele ti muntu yina ke bakisaka mono!”​—Toko mosi ya nkento na Australie.

“Site internet jw.org me salaka nde yo kuma pete mingi sambu mono zwa lusadisu na mambu ya ke yangisa baleke. Disolo mosi sadisaka mono na kuzaba mitindu yina bantu ke yangisaka bantu ya nkaka sambu na kuvukisa nitu ti bo, na kumona nde bo vandaka kuyangisa mono sambu na mambu ya mutindu yina, mpi na kuzaba mutindu ya mbote ya kunwana ti yo.”​—T. W., West Indies.

“Mwana na mono ya kele ti bamvula kumi ti ndambu kele mubulu. Mbala mingi mono ke yitukaka mutindu yandi ke vandaka kisaka-saka mpi ke salaka mambu ya beno ke yindula ve. Yo yina, beto vandaka kusolula na mpasi. Kilumbu mosi, mono kotaka na jw.org mpi mono ponaka kitini ya ke tubila bankwelani mpi bibuti. Mono monaka masolo mingi yina ke wakana ti mambu na mono mpi yina longaka mono mutindu ya kusolula ti mwana na mono. Yandi mpi me bakaka mambote na site internet yai. Ntangu yai yandi ke solulaka ti mono kukonda mpasi mpi ke zabisaka mono mambu ya ke pesa yandi kiese mpi ya ke yangisa yandi.”​—C. B., Afrika.

“Sambu na beto bibuti, jw.org ke pesa beto mutindu ya mbote ya kulonga bana na beto. Mu mbandu, video ya ke tubila mutindu ya kuvanda nduku ya mbote sadisaka bana na beto na kuvanda ti dibanza ya mbote sambu na kinduku mpi na kupona banduku bantu yina ta vanda ti bupusi ya mbote na luzingu na bo. Mbala mingi disolo mosi ke basikaka na jw.org na ntangu ya mbote mpi yo ke sadisaka beto na kunwana ti diambu mosi ya mpasi yina bana ke kutana ti yo. Yo kele nto ya nene ya bandongisila.”​—E. L., Eropa.

“Mono ti nkento na mono, beto me kwelanaka banda bamvula sambanu. Bonso bankwelani yonso, beto me kutanaka ti diambu ya mpasi ya kuwakanisa mitindu na beto ya kusolula, bangindu na beto, mpi mutindu na beto ya kutadila mambu. Disolo ya jw.org ya kele na ntu-diambu ‘Mutindu ya Kuvanda Muwi ya Mbote’ bendaka dikebi na mono. Yo pesaka beto bandongisila ya mbote ya ke monisa mutindu ya kutomisa mayele na beto ya kuwidikila. Mono tangaka disolo yina mpi na nima mono tadilaka yo ti nkento na mono. Beto me mekaka na kusadila bandongisila yina ya mbote.”​—B. B., West Indies.

“Mono ke vukanaka ti Bambangi ya Yehowa katuka mvula me luta, mpi mono ke zola kibeni kumonisa ntonda na mono sambu na site internet jw.org. Mono me longukaka mambu mingi na site yai, tanga mpi mutindu ya kuyala makasi na mono mpi mutindu ya kuvanda bakala mpi tata ya mbote. Mono lenda tuba na masonga yonso nde site internet yai me gulusaka makwela na mono.”​—L. G., West Indies.

“Site internet jw.org sadisaka mono na kudiwa nde mono kele na luzingu. Na nzila ya bavideo ya Ndinga ya Bidimbu ya Amerika, mono me zabaka mbote kibeni ndinga ya bidimbu. Mbala mingi mono vandaka kuwa bonso nde mono lenda kuditudila ve balukanu ya mfunu na luzingu, kansi ntangu mono monaka video Kumona Ndinga ya Nzambi na Ndinga na Mono, yo simbaka ntima na mono mpi yo kumisaka ngolo lukanu na mono ya kutula dikebi na mambu ya mbote ya luzingu.”​—J. N., Afrika.

“Site internet yai kele mfunu kibeni. Mono kele nsadi ya luzolo ya mbote yina ke sadisaka bababa, mingi-mingi baleke yina kele bababa. Masolo mingi kibeni ya ndinga ya bidimbu yina kele kuna me sadisaka mono na kuzaba mbote ndinga ya bidimbu. Site yai me sadisaka mono na kusadisa bantu yina ke zola kutomisa luzingu na bo ya dibuta mpi kinduku na bo.”​—K. J., West Indies.

“Mono kele kifwa-meso yina me bakaka mambote na jw.org. Yo ke pesaka mono bansangu yina lenda baka bangonda mingi na kukumina mono kana bo tindila mono yo na email. Site internet yai me tomisaka luzingu na mono ya dibuta mpi yo me kumisaka mono muntu ya mfunu na bwala na mono. Yo me sadisaka mono mpi na kubaka bansangu na ntangu mosi ti bampangi na mono yina ke monaka mbote.”​—C. A., Amerika ya Sudi.

“Sambu na bantu yina ke tangaka ve to kele ve ti mbongo sambu na kusumba mikanda ya Bisono ya Bifwa-Meso, jw.org kele kibeni kimvwama. Na nzila ya bansangu ya mbote ya kuwidikila, bifwa-meso lenda tanga bansangu ya mpa ya ke tubila mambu mingi. Bo me yidikaka site internet yai sambu na bantu yonso kukonda kupona-pona to kumona bo mpamba. Yo ke sadisaka beto bifwa-meso na kumona nde beto kele na lukumu mpi nde beto kele na kati ya bantu.”​—R. D., Afrika.

“Kima ke swaswanisa site internet na beno ti basite internet ya mabundu ya nkaka kele nde yo ke fulusa ve bantu ti bangogo mingi ya lusambu yina kaka nganga-nzambi mpamba lenda bakisa. Mpi yo ke fulusa ve bantu ti bansangu mingi kuluta ebuna yo ke sala nde bo bakisa kima ve. Site internet na beno kele pete mpi yo ke tubaka mbala mosi. Yo kele ve ti mambu mingi-mingi to ya kufuluka ti filozofi. Yo ke salaka ve nde bantu kumona nde lukwikilu kele kima mosi ya mpasi mingi. Kansi, yo ke monisaka nde lukwikilu kele kima yina bantu yonso lenda vanda ti yo.”​—A. G., Azia.

“Mawa! Yina mutindu luzingu na mono zolaka kuvanda kana jw.org vandaka ve. Na nsi-ntoto yina kele na mpimpa ya kimpeve, site internet yai kele bonso ampoule yina mono lenda pedisa. Na mbala mosi, mono lenda mona mpi kuwa masolo ya ke tendula mutindu Nzambi ke tadilaka diambu mosi buna mpi kubaka bamvutu na bangiufula mingi ya luzingu.”​—J. C., West Indies.

“Mono ke sepelaka ti lusadisu yonso ya kimpeve ya mono ke bakaka awa na kati-kati ya mfinda na Amerika ya Sudi. Kana site internet yai vandaka ve, mono zolaka kuvila nzila.”​—M. F., Amerika ya Sudi.