Na kati-kati ya mfinda ya Amazone kele ti Nzo ya mpa ya Balukutakanu ya Nene ya Bambangi ya Yehowa. Bo tungaka yo na kibansala mosi ya ba ektare 52 yina kele na nordi ya mbanza ya Manaus, na Brésil; kisika yina ya mvimba kele mfinda. Ba tiaku yina kele na mansala ya mikubu mingi, ba toucan, mpi bandeke ya nkaka ke yimbaka na zulu ya banti ya cupuaçu, mikanzi ya nene ya Brésil (noyers du Brésil), mpi banti ya angelim pedra. Sambu na nki kutunga Nzo ya Balukutakanu ya Nene awa?

Mbanza ya Manaus, yina kele na kitamina ya bakilometre 1 450 katuka na munoko ya Nzadi Amazone, kele ti bantu kiteso ya bamilio zole. Bantu ta sadilaka nzo yai kele Bambangi ya Yehowa kiteso ya 7 000 ya mbanza Manaus mpi ya babwala yina kele na nziunga na yo, tanga mpi tubabwala ya pene-pene mpi bamasa yina ke kwisaka kulosa kuna. Mbanza ya kuluta ntama, São Gabriel da Cachoeira, kele na kitamina ya bakilometre 800 na westi ya Manaus. Sambu na kukwenda na lukutakanu ya nene na Nzo ya Balukutakanu ya Nene, Bambangi ya nkaka ke salaka nzietelo na bwatu bilumbu tatu!

Kutunga Nzo ya Balukutakanu ya Nene na kati-kati ya Amazone vandaka ve diambu ya pete. Yo lombaka kunata bisadilu na bakontenere 13 yantika na dibungu ya Santos, na Sao Paulo; bo nataka yo na lweka ya masa ya Brésil; mpi na nima bo nataka yo na Nzadi ya Amazone tii kuna yo kumaka kisika ya kutunga.

Nzo yai ya mpa kele Nzo ya Balukutakanu ya Nene ya 27 yina bo me tunga na Brésil, mpi na Lumingu, Mayi 4, 2014 bantu 1 956 kwisaka na manaka ya kutambika yo yina bo salaka. Bantu mingi vandaka na kiese sambu yo vandaka mbala na bo ya ntete ya kukwenda na lukutakanu na Nzo ya Balukutakanu ya Nene.

Bawi vandaka kuwa mpi kumona mutubi. Yai nsoba ya nene kana beto fwanisa yo ti bamvula yina me luta, sambu na ntama, bo vandaka kusala balukutakanu ya nene na bisika ya bantu yonso, mpi bantu mingi vandaka kumona ve estrade mpi mutubi. Mbangi mosi tubaka nde, “Mu ke kwendaka na balukutakanu ya nene yantika bamvula mingi, kansi mu vandaka kukaka ve kumona ntangu drame ya Biblia ke salama; mu vandaka kuwa kaka ndinga.” Ntangu yai bantu yonso ke mona estrade.