Mono butukaka na Calgary mbanza mosi na Provense ya Alberta na Canada. Ntangu mono vandaka mwana ya fioti, bibuti na mono fwaka makwela mpi mono ti mama na mono, beto kwendaka kuzinga kisika mosi ti ba-nkaka. Ba-nkaka na mono vandaka kuzola beto mingi. Mono vandaka mwana mosi ya kiese kibeni. Mono ke yibuka diaka bamvula yina beto lutisaka mpi ya beto vandaka kuzinga na ngemba.

 Ntangu mono kumaka ti bamvula 7, luzingu na mono kumaka mbi kuluta ntangu papa kwelanaka diaka ti mama. Beto kwendaka kuzinga na États-Unis na Saint-Louis. Yo kele mbanza mosi na Missouri. Mono kwisaka kuzaba nde tata na mono vandaka muntu ya nku mingi. Mu mbandu, ntangu mono vutukaka na nzo-nkanda na kilumbu ya ntete na ekole ya mpa yina bo sonikisaka mono, yandi waka nde banduku na mono nwanisaka mono mpi nde mono salaka ve ata kima mosi sambu na kuvutudila bo. Yandi waka makasi mingi mpi yandi bulaka mono ngolo kuluta banduku na mono. Diambu ya mawa kele nde, yo pesaka mono dilongi. Kaka ti bamvula 7, mono kumaka kunwana ti bantu.

 Kikalulu yina ya mbi ya tata na mono pesaka mama mpasi mingi. Mbala mingi, bo vandaka kuswana. Ntangu mono kumaka ti bamvula 11, mono yantikaka kunwa malafu mpi bima ya ke lawusaka. Mono kumaka makasi kuluta mpi mbala na mbala, mono vandaka kunwana ti bantu na bala-bala. Ntangu mono manisaka nzo-nkanda ya sekondere, mono vandaka toko mosi ya kuluta nku.

 Ntangu mono lungisaka bamvula 18, mono kotaka na kimvuka ya basoda yina ke nwanaka na masa na insi États-Unis (Corps des marines des États-Unis). Mono bakaka formasio mpi mono kumaka muntu mosi ya makasi mpi yina zabaka mbote-mbote kufwa bantu. Na nima ya bamvula tanu, mono yambulaka kisalu ya kisoda mpi mono kwendaka kulonguka bikalulu ya bantu (Psychologie) ti kivuvu ya kusala ti bapolisi ya FBI (yo kele biro ya ke salaka baanketi na États-Unis). Mono yantikaka kulonguka na États-Unis mpi mono landaka kulonguka na Canada, kisika ya mono vutukaka kuzinga.

 Na iniversite, mono vandaka diaka ve ti kivuvu sambu bantu mpi ntoto vandaka kusala mambu ya vandaka kusepedisa mono ve. Bantu vandaka bwimi, mambu yonso ya ntoto vandaka mpamba mpi mpila ya kumanisa bampasi ya bantu vandaka ve. Mono vandaka diaka ve ti kivuvu nde kilumbu kele, bantu ta kumisa ntoto mbote.

 Na meso na mono, luzingu vandaka ve mfunu. Yo yina mono kumaka kunwa malafu mpi bima yina ke lawusaka. Mono yantikaka kusosa mbongo na mutindu ya mbi mpi kusosa kiese na kuvukisaka nitu. Luzingu na mono vandaka kaka ya kukwenda kutambula-tambula na nkokila mpi kusosa bankento. Mutindu mono bakaka formasio ya kisoda, mono vandaka kudikotisa-kotisa na bitumba. Mono vandaka ti mutindu na mono ya kutadila lunungu mpi mono vandaka kutelemina konso muntu yina me konda lunungu. Kansi na kutuba ya mbote, mono kumaka diaka mpika ya mambu ya mubulu.

 Kilumbu mosi, mono ti nduku na mono mosi, beto vandaka kudibongisa sambu na kukwenda kubikila bantu diamba. Beto vandaka kudibongisa na nsi ya ntoto ya nzo na mono. Beto mosi mpi, beto vandaka me nwa dezia diamba. Na ntangu mosi buna, nduku na mono yulaka mono kana mono ke kwikilaka na Nzambi. Mono songaka yandi nde: “Kana Nzambi muntu kele na kisina ya bampasi ya kele na ntoto, mono ke zola kuzaba ve ata kima mosi ya me tala yandi!” Na kilumbu ya kulanda mono yantikaka kisalu ya mpa. Nduku mosi ya kisalu yina vandaka Mbangi ya Yehowa yulaka mono nde: “Keti nge ke yindula nde Nzambi kele na kisina ya bampasi ya kele na ntoto?” Mutindu mono tubilaka ngiufula yai ti nduku na mono na mpimpa, mono yitukaka ntangu yandi yulaka mono ngiufula yango mpi yo bendaka dikebi na mono. Na bangonda sambanu yina landaka, beto solulaka mambu mingi. Yandi pesaka mono bamvutu na bangiufula ya nkaka ya me tala luzingu yina vandaka kuyangisa mono mpi bamvutu yango katukaka na Biblia.

 Nkento yina mono silaka na makwela mpi yina vandaka kuzinga ti mono vandaka kuzola ve nde mono songa yandi mambu ya mono vandaka kulonguka. Kilumbu mosi na Lumingu, mono songaka yandi nde mono me bingisa Bambangi ya Yehowa na nzo sambu bo longa beto Biblia. Na kilumbu ya kulanda, ntangu mono katukaka na kisalu mpi vutukaka na nzo, mono kutaka nzo ya mpamba. Yandi bakaka bima yonso mpi yandi kwendaka. Mono basikaka na nganda mpi mono dilaka. Mono sambaka Nzambi mpi mono lombaka yandi lusadisu. Yo vandaka mbala ya ntete ya mono sadilaka zina ya Nzambi Yehowa na kisambu na mono.—Nkunga 83:18.

 Na nima ya bilumbu zole, mono yantikaka kulonguka na mono ya ntete ya Biblia ti Bambangi ya Yehowa. Mono yantikaka kulonguka ti bakala mosi ti nkento na yandi. Ntangu bo kwendaka, mono landaka kutanga mukanda Nge Lenda Zinga Mvula na Mvula na Ntoto Yina Takituka Paladisu mpi mono manisaka kutanga yo na mpimpa. a Mambu ya mono longukaka na yina me tala Yehowa Nzambi ti Mwana na yandi Yezu Kristu simbaka ntima na mono. Mono monaka nde Yehowa kele Nzambi ya mawa mpi yandi ke waka mpasi ntangu beto ke monaka mpasi. (Yezaya 63:9) Kima ya simbaka mingi ntima na mono vandaka zola yina Nzambi kele ti yo sambu na mono mpi kimenga yina mwana na yandi pesaka sambu na mono. (1 Yoane 4:10) Mono bakisaka nde Yehowa monisilaka mono ntima-nda sambu “yandi ke zola ve nde ata muntu mosi kufwa, kansi yandi ke zola nde bantu yonso kubalula ntima.” (2 Piere 3:9) Yehowa zolaka nde mono vanda nduku na yandi.—Yoane 6:44.

 Mono yantikaka kukwenda na balukutakanu konso mposo. Mono vandaka ti nsuki ya nda, bima ya makutu mpi kana muntu kutala mono, yandi fwete banga. Kansi Bambangi ya Yehowa sadilaka mono mambu bonso mpangi na bo mosi ya me vutuka mpi ya bo me monaka ntama. Bo ke salaka mambu mutindu Bakristu ya Kieleka ke salaka. Mono waka bonso nde mono me vutuka na nzo ya ba-nkaka na mono. Kansi kisika yai me luta na ntama kibeni nzo ya ba-nkaka na mono.

 Mambu yina mono vandaka kulonguka na Biblia sobaka nswalu luzingu na mono. Mono zengaka nsuki, mono yambulaka mambu ya kuvukisa nitu mpi kunwa malafu ya ngolo-ngolo mpi bima ya ke lawusaka. (1 Bakorinto 6:9, 10; 11:14) Mono zolaka kusepedisa Yehowa. Ntangu mono vandaka kulonguka, mono zabaka nde kana mono me zaba nde yandi ke zolaka ve kima mosi buna ya mono ke salaka, mono vandaka ve kupesa bikuma ya kukonda mfunu. Kansi mono vandaka kuwa ntima mpasi mpi mono vandaka kutuba nde: “Mono fwete soba bikalulu na mono.” Mpi kukonda kusukinina, mono vandaka kusoba mutindu na mono ya kuyindula mpi ya kusala mambu. Mono monaka mambote yina bantu ke bakaka kana bo ke sala mambu mutindu Yehowa ke zola. Yo yina, na kilumbu ya 29 juillet 1989, bangonda sambanu na nima ya kulonguka na mono ya Biblia ya ntete, mono bakaka mbotika mpi kumaka Mbangi ya Yehowa.

 Biblia me sobaka luzingu na mono. Na bilumbu ya me luta, kana muntu kusosila mono, mono vandaka mpi kusadila yandi mambu na nku yonso. Kansi ntangu yai, mono ke salaka ngolo sambu na kuvanda na “ngemba ti bantu yonso.” (Baroma 12:18) Mono ke kudikumisa ve, kansi mono ke pesa matondo na Yehowa mutindu Ndinga na yandi mpi mpeve santu na yandi me sadisaka mono ngolo na kusoba luzingu na mono.—Bagalatia 5:22, 23; Baebreo 4:12.

 Na kisika ya kuvanda mpika ya bima yina ke lawusaka, ya mubulu mpi ya kiese ya kuvukisa nitu, mono ke salaka yonso sambu na kusepedisa Yehowa mpi na kudipesa na yandi ya mvimba. Na kati ya mambu ya mono ke salaka, mono ke sadisaka bantu ya nkaka na kuzaba yandi. Mwa bamvula na nima ya mbotika na mono, mono kwendaka na kisika mosi ya ntoto sambu na kulonga nsangu ya mbote na bisika yina mpusa ya bansamuni vandaka mingi. Na nima ya bamvula, mono longaka bantu mingi Biblia mpi mono monaka mutindu yo sobaka luzingu na bo kaka mutindu yo sobaka luzingu na mono. Diambu yai pesaka mono kiese mingi. Mono kele mpi na kiese sambu mama na mono me kumaka Mbangi ya Yehowa. Kana yandi kumaka Mbangi ya Yehowa, yo vandaka mpi sambu yandi monaka nsoba na luzingu na mono mpi na bikalulu na mono.

 Na 1999 na Salvador, mono bakaka diplome na nzo-nkanda yina bo ke bingaka Nzo-Nkanda ya Bansamuni ya Kimfumu. Malongi ya mono bakaka na nzo-nkanda yina me pesaka mono formasio mpi yo me sadisaka mono na kukuma ti bikalulu yina ke vandaka mfunu sambu na kupesa mbandu ya mbote na kisalu ya kulonga nsangu ya mbote mpi sambu na kuvanda ngungudi mpi longi na kati ya dibundu. Na mvula ya kulanda, mono kwelanaka ti Eugenia. Mono ke zolaka yandi mingi. Beto zole, beto ke longaka ntangu yonso nsangu ya mbote na Guatemala.

 Sesepi yai, na kisika ya kuvanda muntu ya ke salaka bantu mbi, mono kele na kiese ya mingi. Kusadila mambu ya Biblia ke longaka me sadisaka mono na kubika mambu ya kuvukisa nitu mpi mubulu. Yo me sadisaka mono mpi na kuvanda ti luzingu ya me fuluka na zola mpi ngemba ya kieleka.