Na 2005, bakala ya nkento mosi ya ke zingaka na Inde na zina ya Sowbhagya fwaka. Nkento yai vandaka kuzola bakala na yandi mingi. Yandi vandaka kulungisa mbote kibeni bampusa ya nkento na yandi ti ya mwana na bo ya nkento ya bamvula tatu na zina Meghana. Yo kuminaka Sowbhagya mpasi na kuzwa mbongo ya kufwana sambu yo sadisa yandi ti mwana na yandi na kuzinga.

 Bantu ya nkaka vandaka mpi diaka ve kukipe Sowbhagya. Mambu kumaka diaka mpasi mingi sambu na yandi. Dibuta na yandi kumaka kumona yandi ti mwana na yandi bonso bantu yina ke lombaka bantu mbongo mpi bo vandaka kusonga yandi mbala na mbala nde, yandi kele kizitu sambu na dibuta na bo. Sowbhagya vandaka na mfunu nde bo lembika yandi ntima. Yo yina yandi yantikaka kukwenda na nzo-nzambi mosi. Kansi na nzo-nzambi yango, bantu vandaka kubaka yandi bonso muntu ya kukonda mfunu sambu yandi vandaka nsukami. Yandi yantikaka kusosa kisalu sambu yandi lungisa bampusa na yandi mpi ya mwana na yandi ya nkento. Yandi salaka bikesa mingi sambu na kuzwa kisalu, kansi yo simbaka ve.

 Sowbhagya ke tuba nde: “Mono vandaka diaka ve ti kisika ya kutudila ntima, yo yina mono bakaka lukanu ya kudifwa. Kansi mono zabaka nde kana mono kele ve, mwana na mono ta kutana ti bampasi mingi. Yo yina, mono bakaka lukanu nde beto fwete fwa beto zole.” Sowbhagya monaka nde yandi kele ve mfunu mpi nde bantu ke zolaka yandi ve. Yo yina, yandi basikaka sambu na kukwenda kusumba poison.

 Ntangu Sowbhagya vandaka kuvutuka na nzo, Mbangi mosi ya Yehowa na zina ya Élisabeth pusanaka pene-pene na yandi mpi yantikaka kusolula ti yandi. Sowbhagya songaka yandi nde yandi kele ve ti kisalu. Élisabeth songaka yandi na mawete yonso nde, yandi lenda sadisa yandi na kuzwa kisalu. Élisabeth songaka yandi mpi nde yandi ke kwenda kulonguka Biblia ti muntu mosi. Yo yitukisaka Sowbhagya mingi sambu ata yandi me tambulaka na banzo-nzambi mingi, yandi me bikaka ntete ve kuwa nde bantu ke longukaka Biblia. Élisabeth lombaka Sowbhagya na kukwenda kutala yandi sambu yandi zaba mambu mingi na yina me tala kulonguka Biblia.

 Ntangu Sowbhagya kumaka na nzo na yandi, yandi vandaka kaka kukana kudifwa. Kansi muntu mosi ya ke vandaka pene-pene ti bo bakaka Meghana mpi kwendaka ti yandi. Sowbhagya bakaka lukanu ya kuvingila tii ntangu mwana yandi ta vutuka sambu yandi fwa yandi mpi yandi mosi kudifwa.

 Kansi na ntangu yandi vandaka kukinga nde mwana na yandi kuvutuka na nzo, yandi kwendaka kutala Élisabeth. Élisabeth yambaka yandi mbote kibeni. Ebuna Élisabeth songaka yandi mukanda Inki Biblia Ke Longaka Mpenza? Sowbhagya sosaka kuzaba mambu mingi ya kele na kapu “Bafwa Kele na Wapi?” Kapu yai bendaka dikebi na yandi sambu bakala na yandi katukaka kufwa. Sowbhagya ndimaka kulonguka Biblia kaka kilumbu yina.

 Élisabeth bingisaka Sowbhagya na lukutakanu ya distrike yina salamaka na mposo ya nima. Sowbhagya ndimaka kukwenda. Manaka yina simbaka kibeni ntima na yandi. Yo yina, yandi bakaka lukanu nde yandi ke zola kukuma Mbangi ya Yehowa. Na nima ya lukutakanu yina ya distrike, ntangu yandi vutukaka, yandi zwaka kisalu.

 Sowbhagya landaka kulonguka Biblia. Bubu yai, na kisika ya kusosa kudifwa, yandi me zwaka kima mosi ya ke sadisaka yandi na kuzinga. Yandi bakaka mbotika. Na nima, mwana na yandi ya nkento bakaka mpi mbotika. Bubu yai, bo zole kele bapasudi-nzila ya ntangu yonso. Meghana ke salaka na kintama kisalu ya kubalula mikanda mpi bavideo na babiro ya ke salaka kisalu yai na Inde.

 Sowbhagya ti Meghana ke pesaka mersi mingi mpila Élisabeth kwendaka pene-pene ya Sowbhagya na train, tudilaka yandi dikebi ya masonga, mpi songaka yandi kieleka ya Biblia. Bo ke pesa Yehowa mersi ya mingi. Meghana ke tuba nde: “Bubu yai, beto zolaka kuvanda beto me fwaka dezia kana beto longukaka ve kieleka kilumbu yina. Sesepi beto kele na kiese. Mono ti mama na mono, beto ke vingila na kiese yonso ntangu yina beto ta yamba papa, ntangu beto ta longa yandi mambu ya Yehowa, mpi ta songa yandi mutindu Yehowa gulusaka beto.”