Clodean, kele Mbangi ya Yehowa mpi yandi ke zingaka na Afrique du sud; yandi kotaka hopital sambu bo salaka yandi operation mosi ya ngolo. Yandi vandaka ti bamaladi mingi ya mpasi mpi yo vandaka kulomba nde yandi pona nki lusansu yandi ta ndima bo pesa yandi. Na ntwala ya operation mpi na nima na yo, yandi vandaka ya kulemba, na mpasi mpi ti basusi. Bamposo kiteso ya kumi na nima ya kuvutuka na nzo, yandi vandaka kukuka kaka ve kuvanda. Sambu na maladi ya COVID-19, bantu lendaka ve kukwisa kutala yandi.

 Sambu yandi vandaka kuzola ve kudila-dila sambu na bampasi ya yandi ke kutana ti yo, Clodean lombaka Nzambi na kupesa yandi ngolo ya kupesa bantu kikesa. Ntangu yandi kumaka kuvanda, yandi solulaka ti mpangi-nkento ya voisin na yandi; nkento yango vandaka kulonguka Biblia ti Bambangi ya Yehowa na ntangu mosi buna kansi yandi yambulaka. Clodean zabisaka yandi ngindu mosi ya kitoko ya me katuka na Ndinga ya Nzambi, ebuna yo pusaka nkento yina na kuvutukila kulonguka Biblia. Clodean tendudilaka yandi mpi mambote ya yandi ta baka kana yandi ke landa balukutakanu ya Bukristu; yandi sadisaka mpi longoki yina na kulanda na nzila ya zoom balukutakanu ya dibundu ya kisika yandi vandaka kuzinga. Nkento yango landaka balukutakanu na zoom mpi yandi pesaka nkutu mvutu na disolo mosi ya bangiufula mpi bamvutu.

 Na nima, Clodean solulaka ti leke ya longoki na yandi; mwana-nkento yango vandaka kusepela mingi kulonguka Biblia. Yandi songaka Clodean nkutu bantu ya nkaka yina lenda sepela mpi kulonguka. Inki salamaka? Clodean yantikaka kulonguka Biblia ti bankento iya ya nkaka. Kansi disolo na yandi me suka ve pana!

 Sambu Clodean vandaka kutudila bantu dikebi ya masonga, yandi yantikaka kulonguka Biblia ti bankento kumi ya nkaka, kaka na nsungi ya maladi yai ya corona; na kimvuka bo vandaka bantu 16! Bankaka ke landaka balukutakanu ya Bukristu mbala na mbala na nzila ya zoom. Kuvanda ti mambu mingi ya kusala na mutindu yai me sadisaka Clodean na kutula ve dikebi kaka na bampasi na yandi mosi. Yandi ke yindula mpi nde sambu Yehowa, “Nzambi yina ke lembikaka bantu yonso,” lembikaka yandi na bampasi na yandi, yandi me lembikaka mpi bantu ya nkaka.—2 Bakorinto 1:3, 4.

 Inki mutindu balongoki ya Clodean ke tadila mambu yina bo me longuka? Mosi na kati na bo ke tuba nde: “Mono me baka mambote na mitindu mingi. Kansi, kima ya mfunu mingi vandaka kuzaba zina ya Nzambi. Yo me sadisaka mono na kukwenda pene-pene ya Yehowa.” Ebuna nkento ya ntete yina Clodean solulaka ti yandi? Nkento yina ke na kudibongisa sambu na kubaka mbotika. Mambu yai me pesaka Clodean kiese mingi. Yandi belukaka mbote na nima ya operation.