Virginia kele Mbangi ya Yehowa. Yandi ke belaka maladi mosi buna (syndrome d’enfermement). Nitu na yandi ke nikanaka diaka ve. Yandi ke monaka mpi yandi ke waka. Yandi lenda kanga meso mpi kukangula yo. Yandi ke nikisaka mpi ntu malembe. Kansi yandi ke tubaka ve mpi yandi ke diaka ve. Na ntwala nde yandi kuma mutindu yai, yandi vandaka ti sante ya mbote. Kansi na 1997, kilumbu mosi na suka, yandi waka mpasi mosi ya ngolo na nima ya ntu mpi yo vandaka kumana ve. Bakala na yandi nataka yandi na lupitalu. Kansi kaka na nkokila ya kilumbu yina, yandi vandaka diaka ve kudizaba (coma). Yandi kudizabaka bamposo zole na nima ntangu bo tulaka yandi na kisika yina bo ke tulaka bantu yina ke belaka ngolo (soins intensifs). Kansi nitu na yandi vandaka diaka ve kunikana mpi yandi kumaka kuzinga ti apareyi yina ke sadisaka bantu na kupema (respirateur). Na nima ya mwa bilumbu, yandi vandaka diaka ve kuzaba ata kima. Yandi vandaka mpi kudizaba diaka ve.

 Mpangi-nkento Virginia ke tuba mambu yina salamaka na nima. Yandi ke tuba nde: “Malembe-malembe, mono kumaka kuyibuka mambu. Mono sambaka Yehowa ngolo. Mono vandaka ve kuzola kufwa mpi kubika mwana na mono ya bakala ya bamvula 9 kukonda mama. Sambu mono baka kikesa, mono mekaka kuyibuka baverse mingi ya Biblia.

 “Na nima, bo basisaka mono na kisika yina bo ke tulaka bantu yina ke belaka ngolo. Na nima ya kusala bangonda 6 na balupitalu ya mutindu na mutindu mpi na kisika yina bo ke sadisaka bantu sambu nitu na bo kukuma diaka kusala kana yo vandaka kusala diaka ve mbote, mono vutukaka na nzo. Ata mpidina, nitu na mono vandaka kunikana kaka ve mpi mono lendaka kusala ve ata kima mosi mono mosi. Mono lembaka kibeni nitu. Mono vandaka kudiwa bonso nde mono lenda sala ve ata kima mosi sambu na bantu ya nkaka, yo vanda sambu na Yehowa. Mono vandaka mpi kudiyangisa sambu mono lendaka ve kusansa mwana na mono ya bakala.

 “Mono yantikaka kutanga masolo ya bampangi ya nkaka ya babakala mpi ya bankento. Bampangi yai vandaka mpi kubela bamaladi ya ngolo bonso mono. Mono yitukaka na kumona mambu yina bo lendaka kusala sambu na Yehowa. Yo yina, mono salaka yonso sambu na kukuma kutadila mambu na mutindu ya mbote mpi mono kumaka kutula dikebi na mambu yina mono lenda sala. Na ntwala nde mono yantika kubela, mono vandaka ve ti ntangu mingi sambu na mambu ya kimpeve. Kansi bubu, mono me kumaka ti kilumbu ya mvimba, konso kilumbu sambu na mambu ya kimpeve. Yo yina, na kisika nde mono lemba nitu, mono ke salaka ngolo sambu mono tula dikebi na kinduku na mono ti Yehowa.

 “Mono me longukaka mutindu ya kusadila ordinatere. Mono ke sadilaka programe mosi ya ordinatere. Programe yango ke sonikaka mambu na ordinatere na kutadila mutindu mono ke nikisaka ntu. Kusadila programe yai ke lembisaka mono. Kansi yo ke sadisaka mono na kulonguka Biblia mpi na kusonika mikanda to ba message sambu na kusadisa bantu ya nkaka na kuzaba kivuvu ya mono ke vandaka ti yo. Mono ke sadilaka tablo mosi ya kele ti bisono (alphabet) sambu na kusolula ti bantu yina kele na lweka na mono. Muntu yina kele ti mono ke songisaka mono kisono mosi-mosi. Kana yandi me pona kisono ya mbi, mono ke kangulaka meso nene. Kansi kana yandi me pona kisono ya mbote, mono ke kangaka meso. Beto ke salaka mutindu yina tii kuna beto ke basisaka bangogo mpi bansa. Bampangi-bankento ya nkaka na kati ya bampangi-bankento yina ke lutisaka ntangu mingi ti mono me kumaka kuzaba mbote na ntwala mambu ya mono ke zola kutuba. Bantangu ya nkaka kana bo me vila mambu ya mono ke zola kutuba, beto ke sekaka.

 “Mono ke zolaka mingi kibeni kupesa maboko na mambu ya dibundu. Mono ke salaka ntangu yonso balukutakanu ti dibundu na nzila ya Internet mpi bubu yai, beto me kumaka kusala yo na nzila ya video. Mono ke sonikaka bakomantere na mono mpi mpangi mosi ke tangaka yo ntangu beto ke salaka masolo ya bangiufula mpi bamvutu. Mono ke vukanaka mpi na nzila ya Internet ti kimvuka na beto ya kisalu ya bilanga sambu na kulanda emisio ya JW Télédiffusion a yina ke basikaka konso ngonda.

 “Mono me sala dezia bamvula 23 ti maladi (syndrome d’enfermement). Bantangu ya nkaka, mono ke vandaka mawa-mawa. Kansi sambu na kulanda ve kuvanda mawa-mawa, mono ke sambaka, mono ke vukanaka ti bampangi-babakala mpi bampangi-bankento mpi mono ke landaka kusala mingi mambu ya kimpeve. Nkutu, ti lusadisu ya bampangi na dibundu, mono me sala dezia bamvula kuluta sambanu na kisalu ya kimupasudi-nzila nsadisi. Mono salaka yonso sambu mono pesa mwana na mono Alessandro mbandu ya mbote. Bubu yai, yandi me kwelaka mpi yandi kele nkuluntu. Yandi ti nkento na yandi, bo kele bapasudi-nzila ya ntangu yonso.

 “Mbala mingi mono ke yindulaka na mudindu mambu yina mono ta sala na paladisu. Kima ya ntete ya mono kele ti nzala ya ngolo ya kusala kele kusadila ndinga na mono mosi sambu na kutubila mambu ya me tala Yehowa. Mono ta sepela kukwenda kutambula na lweka ya mwa masa sambu na kutala bima ya kitoko yina Nzambi me salaka. Sambu na kudia, mono ke sadilaka singa mosi (sonde) banda bamvula kuluta 20. Yo yina, mono ke vingila ti nzala ya ngolo ntangu yina mono ta buka mbuma mosi mpi mono ta dia yo. Ya kieleka, mutindu mono kele muntu ya insi Italie, mono ke vingila ti nzala ya ngolo kulamba mpi kudia madia yina bantu ya Italie ke zolaka, mu mbandu pizza.

 “‘Kivuvu ya luguluku’ me sadisaka mono na kutanina mabanza na mono. (1 Batesalonika 5:8) Mono ke kudimonaka na nsi-ntoto ya mpa mpi yo ke pesaka mono kiese mingi ata nitu na mono lenda sala ve mambu ya nkaka mpi mono ke ndima nde ntama mingi ve, nitu na mono ta kuma kusala mambu yonso. Ee, mono ke vingila ti nzala ya ngolo ntangu yina mono ta zinga ‘luzingu ya kieleka’ yina Yehowa me tubaka nde yandi ta pesa beto na nzila ya Kimfumu na yandi.”—1 Timoteo 6:19; Matayo 6:9, 10.