Bob vandaka kutambusa kaminio na Provense ya Alberta na Canada. Yo vandaka kilumbu mosi ya madidi mpi ya mupepe ya ngolo. Yandi vandaka kutambusa kaminio yango na vitesi ya 100 kilometre na ngunga mosi. Ntangu yandi vandaka kukwenda, pine yina ke vandaka na diboko ya kimama tobukaka. Ntete Bob vandaka ve kuzaba mambu yina salamaka mpi yandi vandaka kaka kukwenda. Yo bikalaka kaka bakilometre 5 sambu yandi kuma na nzo na yandi.

 Na mukanda yina Bob tindilaka dibundu mosi ya Bambangi ya Yehowa, yandi tubaka nde: “Batoko tanu vandaka na nima na mono mpi ntangu bo kumaka kisika mono vandaka, bo kitisaka bavitre ya kaminio na bo. Bo songaka mono nde pine mosi ya kaminio na mono me tobuka. Beto tulaka kaminio na lweka ya nzila, mpi bo lombaka nde bo sadisa mono na kutula pine ya nkaka. Mono vandaka kuzaba ve kana mono vandaka ti pine ya nkaka to krike. Mono vandaka na ndambu ya nsi ya nzila, ya kuvanda na kiti ya bapine, kansi bo, bo kotaka na nsi ya kaminio. Bo monaka pine ya nkaka ti krike. Bo katulaka pine yina tobukaka mpi bo tulaka pine ya nkaka. Madidi vandaka ngolo mpi neze vandaka kubwa. Bo lwataka mbote, ata mpidina bo katulaka pine yina tobukaka mpi bo tulaka pine ya nkaka sambu mono kwenda. Kana mono vandaka mono mosi, mono zolaka ve kukuka kusala yo.

 “Mersi na batoko tanu ya Bambangi ya Yehowa yina sadisaka mono. Bo vandaka kukwenda na banzo ya bantu sambu na kulonga Biblia. Batoko yina ke sadilaka kibeni mambu yina bo ke longaka. Kana bo sadisaka mono ve, mono zolaka ve kukuka kukatuka kisika yina. Mono ke songa beno masonga. Mono ke pesa kibeni mersi sambu na diambu yina bo salaka. Nani me zaba? Mbala ya nkaka batoko yina vandaka na nzila kilumbu yina vandaka bawanzio.”