Na ntangu ya maladi yai ya COVID-19, bampangi na beto ya babakala mpi ya bankento sobaka mutindu na bo ya kulonga bantu ya nkaka nsangu yina ke pesaka kikesa ya kele na Biblia. Na kisika ya kukwenda kuta kimbangi na bisika yina bantu ke vandaka mingi to na banzo na bo, bo longaka bantu nsangu ya mbote mingi-mingi na nzila ya telefone mpi ya kusonika mikanda. a Bantu mingi pesaka bo mersi sambu na bikesa na bo, mpi yo monikaka nde Yehowa sakumunaka bo. (Bingana 16:3, 4) Beto tadila mwa mambu yina salamaka na kisanga mosi.

 Na ntwala nde maladi yai kuyantika, Helen vandaka kukwenda kutala mbala na mbala nkento mosi ya me kwelaka mpi yandi vandaka kulomba nkento yango na kulonguka Biblia ti yandi. Kansi nkento yango vandaka kaka kubuya. Ata mpidina, kilumbu mosi na ntwala nde bo tuba nde bantu fwete basikaka diaka ve sambu na maladi ya COVID-19, Helen pesaka yandi Biblia mpi mukanda Inki Biblia Ke Longa Beto? Na ntangu bantu vandaka diaka ve kubasika, Helen lombaka yandi diaka na kulonguka Biblia ti yandi. Yandi songaka yandi nde bo ta landa kulonguka na nzila ya telefone. Na mbala yai, nkento yina ndimaka kulonguka Biblia. Yandi sepelaka kibeni mutindu bo vandaka kulonguka mpi ntangu fioti na nima, yandi songaka Helen nde bo yantika kulonguka konso kilumbu. Nkento yina yantikaka mpi kulanda balukutakanu ya Bukristu na nzila ya telefone. Diaka, yandi ke sadilaka mambu ya yandi ke longukaka na Biblia na luzingu na yandi mpi yandi ke longaka yo bantu ya nkaka.

 Na dibundu mosi buna, Bambangi ya Yehowa sonikilaka bapolisi ya kele na kisika yina bo ke zingaka mikanda sambu na kupesa bo mersi sambu na kisalu na bo ya mfunu. Bo salaka mpidina sambu na kulonga nsangu ya mbote. Mikanda yina yitukisaka bapolisi yina. Mfumu mosi songaka Jefferson, ya kele nkuluntu na dibundu nde: “Mono vandaka kuyindula nde Bambangi ya Yehowa ke zolaka ve bapolisi.” Jefferson songaka yandi nde yo kele ve masonga. Bapolisi sepelaka mingi ti bangogo yina bampangi sonikilaka mikanda yina. Bo tulaka mikanda yango na porte ya biro na bo. Mfumu ya nkaka tubaka nde: “Mukanda yai lenda sadisa bantu ya nkaka na kutadila beto na mutindu ya mbote.”

 Edna ti Ednalyn kele bapasudi-nzila ya ntangu yonso. b Bo ke vandaka ve ti Internet na nzo na bo, yo yina mpila ya kuvukana ti dibundu na bo sambu na kulanda balukutakanu na nzila ya video ke vandaka ve. Yo yina, bo bingaka nkento mosi ya ke zingaka pene-pene ti bo sambu na kulomba yandi kana bo lenda sadila Wi-fi na yandi mpi kufuta mbongo yina yo ta lomba sambu na ntangu yina bo ta sadila yo. Na mawete yonso, nkento yina pesaka bo nzila ya kusadila yo kukonda kufuta mbongo. Ntangu Edna ti Ednalyn bingisaka yandi na kulanda lukutakanu ti bo, nkento yina kwisaka. Bubu yai nkento yina, mwana na yandi mosi ya nkento mpi bantekolo na yandi zole ya bankento ke longuka Biblia ti Bambangi ya Yehowa mpi bo ke vukanaka mbala na mbala na balukutakanu ya Bukristu.

 Bampangi-babakala mpi bankento ya dibundu ya kisika yina bingisaka bantu yina ke zingaka pene-pene ti bo, bantu yina ke salaka ti bo, mpi bantu ya nkaka na kulanda diskure mosi yina mpangi ta sala na nzila ya video. Ellaine, yina ke salaka na lupitalu mosi ya kisika yina, vandaka ntete kuzola ve kubingisa bantu yina yandi ke salaka ti bo. Yandi yindulaka nde badoktere ya nkaka ke tadilaka ve Bambangi ya Yehowa na mutindu ya mbote. Ata mpidina, yandi tindilaka badoktere ya lupitalu yina ba messages ya mbote. Ellaine vandaka ve kuzola kubingisa badoktere zole. Bo vandaka bakala ti nkento. Yandi tadilaka diambu yango mpi yandi sambaka. Na nima, yandi tindilaka bo message. Nkento tubaka nde: “Nge ke zola nde mono kuma Mbangi ya Yehowa?” Ellaine tubaka nde konso muntu lenda landa balukutakanu na beto, Bambangi ya Yehowa mpamba ve. Kilumbu ya kulanda, Ellaine yitukaka ntangu yandi monaka nkento yina ti bakala na yandi me kota na ntwala sambu na kulanda lukutakanu. Yandi ke tuba nde: “Na ntwala nde lukutakanu kumana, nkento sonikilaka mono nde: “Yai kele mbala ya ntete ya mono ke landa lukutakanu ya Bambangi ya Yehowa. Yo kele mbote. Mono me sepela. Matondo mutindu nge bingisaka mono.”

 Ellaine bingisaka badoktere 20 na lukutakanu mpi yandi vandaka na kiese ya kuzaba nde 16 landaka lukutakanu. Yandi vutukilaka mambu yina ntumwa Polo tubaka mpi yandi tubaka nde: “Mono kele na kiese sambu mono ‘bakaka kikesa’ ya kulonga ‘nsangu ya mbote ya Nzambi’ na banduku na mono ya kisalu.”—1 Batesalonika 2:2.

 Maladi yai me natila bantu yonso mpasi. Kansi bampangi na beto ya babakala mpi ya bankento yina kele na kisanga mpi na bisika ya nkaka me kuka kulanda kuvanda na kiese mpi kuvanda ti mabanza ya mbote na nsadisa ya mambu yina bo lenda sala sambu na kupesa bantu ya nkaka kikesa mpi kusadisa bo.—Bisalu 20:35.