Marta kele Mbangi ya Yehowa. Yandi ke zingaka na Guatémala. Yandi ke longukaka ndinga yina bo ke bingaka Kekchi sambu na kulonga bantu ya ke tubaka ndinga yango mambu ya kele na Biblia. Kilumbu mosi, yandi monaka bakala mosi ke basika na lupitalu. Ntangu yandi talaka bilele na yandi, yandi tubaka na nsi ya ntima nde yo fwete vanda nde bakala yina katukaka na bwala mosi ya bo ke tubaka Kekchi, na ntoto mosi ya bangumba yina Bambangi ya Yehowa me longaka ntete ve mingi. Yandi kwendaka pene-pene ya muntu yina mpi yandi sadilaka mwa bangogo ya Kekchi yina yandi zabaka sambu na kusolula ti yandi.

 Marta lombaka bakala yina na kuyantika kulonguka Biblia. Bakala yango ndimaka na kiese yonso, kansi yandi tubaka nde yandi kele ve ti mbongo ya kufuta sambu na kulonguka Biblia. Marta songaka yandi nde Bambangi ya Yehowa ke longaka bantu Biblia ya ofele. Yandi songaka yandi mpi nde yandi lenda longuka Biblia na telefone mpi nde dibuta na yandi lenda vukana ti yandi na kulonguka yina. Bakala yina ndimaka. Bakala yango zabaka kutuba mpi kutanga Ki-espaniole, yo yina Marta pesaka yandi Mbalula ya Nsi-Ntoto ya Mpa na Ki-espaniole. Yandi pesaka yandi mpi mukanda Inki Biblia Kelongaka Mpenza? ya ndinga Kekchi. Na mposo yina landaka, bakala yango, nkento na yandi mpi bana na bo zole yantikaka kulonguka Biblia ti Marta na telefone. Bo vandaka kulonguka mbala zole konso mposo. Marta tubaka nde: “Mutindu mono vandaka kuzaba ve mbote ndinga Kekchi, mono vandaka kulonguka ti bo na Ki-espaniole mpi bakala yina vandaka kubaludila nkento na yandi na ndinga Kekchi. Bana zabaka Ki-espaniole.”

 Bakala yina vandaka pastere na dibundu na yandi. Yandi yantikaka kulonga bantu ya dibundu yina mambu yina yandi vandaka kulonguka na Biblia. Bantu ya dibundu yango sepelaka ti mambu yina bo waka mpi yulaka yandi sambu na kuzaba na wapi yandi longukaka mambu yina ya mpa. Ntangu yandi songaka bo nde yandi ke longukaka Biblia, bo yonso muntu mosi-mosi, bo yantikaka mpi kuvukana ti yandi na kulonguka yina ya Biblia. Ntangu fioti na nima, kiteso ya bantu 15 kumaka kuvukana konso mposo sambu na kulonguka Biblia ti Marta na telefone. Sambu bantu yonso kuwa, bo vandaka kutula mikro mosi pene-pene ya telefone.

 Ntangu Marta songaka bankuluntu ya dibundu na bo mutindu yandi vandaka kulonguka ti bantu yina, nkuluntu mosi kwendaka na bwala yina balongoki yango ya Biblia vandaka kuzinga. Yandi bingisaka bo na kukwenda kulanda diskure mosi ya Biblia yina nkengi ya nziunga a ta sala na bwala ya nkaka. Bo ke salaka ngunga mosi na kamio sambu na kukuma na bwala yango yina mpi bangunga zole na makulu. Bantu yina vandaka kulonguka Biblia ndimaka kukwenda. Na kimvuka, babakala ti bankento 17 kwendaka kulanda diskure yina.

 Mwa bamposo na nima, nkengi ya nziunga ti Bambangi ya nkaka ya Yehowa lutisaka bilumbu iya ti balongoki yina ya Biblia. Konso suka, bo vandaka kutala bavideo na ndinga Kekchi na jw.org mpi bo vandaka kulonguka kamukanda Banani Kesala Luzolo ya Yehowa Bubu Yai? Konso midi, bo vandaka kutala bitini ya manaka ya JW Télédiffusion. Nkengi ya nziunga yidikaka mpi mambu sambu konso longoki kuvanda ti mpangi mosi ya ta longukaka Biblia ti yandi.

 Na bilumbu yina iya, Bambangi ya Yehowa longaka mpi na babwala ya pene-pene yina bantu ke tubaka mpi ndinga Kekchi. Bo bingisaka bantu mingi na lukutakanu mosi ya sipesiali. Na lukutakanu yina, bampangi lombaka na bantu 47 yina kwisaka na kubanda kulonguka Biblia konso muntu. Mabuta 11 ndimaka.

 Mwa bangonda na nima, bankuluntu yidikaka mambu sambu lukutakanu mosi kubanda kusalama konso mposo na bwala yina bakala ya ntete yina ndimaka kulonguka Biblia vandaka kuzinga. Bubu yai, kiteso ya bantu 40 ke kwendaka mbala na mbala na balukutakanu. Ntangu bampangi yibukaka lufwa ya Yezu na bwala yina, bo vandaka na kiese sambu bantu 91 kwisaka.

 Ntangu Marta yindulaka mutindu mambu yai yantikaka tii kisika yo me kumaka, yandi tubaka nde: “Mono ke monisaka ntonda na Yehowa. Bantangu ya nkaka, mono ke monaka bonso nde mono ke kukaka ve kusala mambu ya nene. Kansi beto kele bisadilu yina kele na maboko ya Nzambi. Yandi zabaka kima yina vandaka na ntima ya bantu yina ya bwala mpi yandi me benda bo na kuvukana ti bantu na yandi. Yehowa ke zolaka bo.”