Bryn ke zingaka na Caroline du Nord na États-Unis. Yandi kele na Komite ya Ke Salaka na Kuwakana ti Balupitalu. Yandi ke salaka na kuwakana ti balupitalu sambu na kusadisa Bambangi ya Yehowa yina ke bela.

 Sambu na maladi ya COVID-19, balupitalu mingi vandaka kupesa diaka ve bantu nzila ya kukwenda kutala bantu yina ke bela. Bryn bingaka muntu ya lupitalu mosi ya ke yidikaka mambu sambu bantu ya ke bela mpi mabuta kubaka lusadisu ya dibundu, sambu yandi zaba nki mutindu yandi lenda kwenda kusadisa Bambangi ya Yehowa yina ke bela.

 Bryn solulaka ti kilandi ya muntu yina. Mutindu bo buyisaka bantu na kukwenda kutala bantu yina ke bela, Bryn lombaka nde bo pesa nimero na yandi na Bambangi ya Yehowa yina ke bela sambu yandi solula ti bo. Bo pesaka yandi nzila ya kusala mpidina.

 Na nima Bryn yindulaka bantu ya ke salaka na lupitalu yina. Yandi songaka kilandi yina nde yandi sepelaka mingi na kumona mutindu kisalu ke salama na lupitalu yina mpi nde yandi ke ndima nde bantu yonso kele na sante ya mbote. Yandi tubaka diaka nde, yandi tangaka nde bantu mingi, mingi-mingi bayina ke salaka na lupitalu yina, ke kudiyangisa mingi na mabanza sambu na maladi yai ya me panzana na ntoto ya mvimba.

 Kilandi yina songaka yandi nde ya masonga, maladi ya COVID-19 me sala nde bantu mingi ya ke salaka na lupitalu yina kukuma kudiyangisa mingi na mabanza.

 Bryn tubaka nde: “Site Internet na beto kele ti masolo ya mfunu yina lenda sadisa bantu na kudikatula na kigonsa yai. Kana nge kota na site jw.org mpi nge sonika “basusi” na kisika yina bo ke salaka bansosa (zone de recherche), nge ta mona masolo yina ta pesa bantu na beno kikesa.”

 Ntangu bo vandaka kusolula, kilandi yango ya muntu yina ke yidikaka mambu na lupitalu yango kotaka na site. Yandi sonikaka “basusi” na kisika yina bo ke salaka bansosa mpi yandi monaka masolo ya bo me tula kuna. Yandi yitukaka nde: “Eh! Mono ta songa yo na ntwadisi. Yo ta vanda mfunu sambu na bantu na beto mpi bantu ya nkaka. Mono ta niema yo mpi mono ta kabudila yo bantu.”

 Mwa bamposo na nima, Bryn solulaka ti ntwadisi yina yandi mosi. Ntwadisi yango songaka yandi nde ya masonga, bo kotaka na site Internet na beto mpi bo niemaka masolo ya ke tubila basusi mpi masolo ya nkaka ya mutindu mosi. Bo kabulaka masolo yango na minganga mpi na bantu ya nkaka ya ke salaka na lupitalu.

 Bryn tubaka nde: “Ntwadisi yina pesaka mono mersi sambu na kisalu na beto mpi sambu na masolo yina ya kusonika mbote. Yandi tubaka nde yo sadisaka bo mingi kibeni.”