Na 2017 na insi Nicaragua, Bambangi ya Yehowa 12 katukaka na dibungu ya Mosquitos (Miskito) na bato mosi ya fioti. Zina ya mwa bato na bo vandaka Sturi Yamni. Mpangi-bakala mosi na zina ya Stephen ke tuba nde: “Lukanu na beto vandaka ya kukwenda kupesa kimvuka mosi ya fioti ya Bambangi ya Yehowa kikesa. Bo vandaka kuzinga na kisika mosi ya ntama. Beto vandaka mpi ti mfunu ya kusadisa bo na kulonga nsangu ya mbote na teritware na bo yina ya nene.”

 Bambangi ya Yehowa yina 12 katukaka na Laguna de Perlas mpi bo lutilaka na Río Grande de Matagalpa. Yo vandaka na bakilometre 200. Zina ya mwa bato na bo yina vandaka kutendula “Nsangu ya Mbote.” Yo kele na ndinga ya bo ke bingaka Miskito. Bo zabaka nde zina yina ta vanda ti ntendula mosi ya mutindu ya nkaka sambu na bantu yina ke zingaka na lweka ya masa. Bampangi yango kumaka na kisika yina bo vandaka kukwenda, na bwala La Cruz de Río Grande. Bo salaka bangunga 12 na nzila kukonda kutanga kisika yina bo kangaka sambu mpimpa bwaka. Ntangu bampangi-babakala mpi bampangi-bankento yina kumaka, bampangi 6 yina kele Bambangi ya Yehowa na bwala yango yambaka bo mbote kibeni.

 Na mpimpa yina, mupepe mosi ya ngolo bulaka na bwala yango. Bamvula ya ngolo nokaka mpi yo fulusaka bamasa ya fioti-fioti yina kele na Río Grande de Matagalpa. Kaka na nima ya bangunga fioti, masa (fleuve) ya bwala yina fulukaka. Nivo ya masa landaka kukuma mingi bilumbu zole. Masa ya mvula dindisaka nzo ya Kimfumu mpi banzo mingi ya La Cruz. Bampangi-babakala mpi bankento yina kwisaka sadisaka bantu ya bwala yina na kubasika na banzo na bo. Bantu mingi ya bwala yina lalaka bilumbu zole yina landaka na nzo ya mpangi na beto mosi ya nkento. Nzo yango vandaka na etaze.

 Na mpimpa ya kilumbu ya tatu, ntwadisi (maire) ya La Cruz kwisaka kumona Bambangi ya Yehowa sambu na kulomba bo lusadisu. Bato na bo ya fioti, Sturi Yamni, vandaka kabato mosi mpamba ya vandaka ngolo sambu na kusabuka nzadi yina masa fulukaka mingi. Ntwadisi ya bwala yai lombaka bo kana bo lenda nata bantu yina fwete kwenda kusadisa bantu na lweka ya nzadi sambu banzo na bo me dinda na masa. Bambangi ya Yehowa vandaka na kiese ya kusadisa bantu yina.

 Kilumbu ya kulanda na suka, Bambangi ya Yehowa tatu kwendaka ti kimvuka ya bantu yina kwendaka sambu na kusadisa bantu yina me bwila mpasi. Stephen ke tuba nde: “Na ntangu yina, nzadi dasukaka. Nzadi vandaka kunata banti ya nene yina mvula tumunaka. Bitembo ya nene ya masa vandaka kubaluka-baluka mpi masa vandaka kukulumuka na vitesi ya ngolo kibeni.” Ata yo vandaka mpasi, bato yina kumaka na babwala tatu.

 Bambangi ya Yehowa yina tatu sadilaka dibaku yina sambu na kupesa bantu ya babwala yina lusadisu yina bo vandaka ti yo mfunu. Bampangi kabulaka mpi zulunalu Telama! ya 2017. Ntu-diambu na yo fwanaka kibeni: “Kana Kisumbula Me Salama—Mambu Yina Lenda Gulusa Bantu.”

 Lusadisu ya kinsuni mpi ya kimpeve yina Bambangi ya Yehowa pesaka bantu ya babwala yina simbaka kibeni ntima na bo. Bantu ya nkaka na kati na bo tubaka nde: “Bambangi ya Yehowa ke vandaka ya kuyilama na kusadisa bantu na ntangu ya mpasi.” Bantu ya nkaka diaka tubaka nde: “Bo ke zolaka kibeni bantu yina ke zingaka pene-pene ti bo.” Ntangu bantu mingi ya babwala yina monaka bikesa yina Bambangi ya Yehowa salaka sambu na kusadisa Bambangi ya Yehowa ya nkaka mpi bantu ya nkaka, bo kumaka ya kuyilama sambu na kuwa nsangu ya ke pesaka kikesa yina kele na Biblia.