Yanmei kele Mbangi ya Yehowa. Yandi ke zingaka na Asie. Kilumbu mosi, yandi songaka nkento mosi ya kifwa-meso nde yandi ke zola kusadisa yandi na kusabuka mukidi. Nkento yango zina na yandi Mingjie. a Mingjie songaka yandi nde: “Matondo mingi! Nzambi kusakumuna nge!” Ntangu Yanmei waka nkento yina me tuba mpidina, yandi yulaka yandi kana yandi ta zola nde bo tubila mambu ya Biblia ti yandi kilumbu ya nkaka. Bilumbu mingi ya nima, Mingjie songaka mpangi na beto ya nkento nde yo vandaka mvutu ya bisambu na yandi: konso kilumbu yandi vandaka kulomba Nzambi sambu yandi sadisa yandi na kuzaba dibundu ya kieleka. Kansi sambu na nki yandi vandaka kusamba mutindu yina?

 Mingjie tubaka nde na 2008, nduku na yandi mosi ya nkento yina vandaka mpi kifwa-meso bingisaka yandi na kukwenda kusamba na eglize mosi ya ke sadisaka bantu ya kele ti bifu na nitu. Ntangu nganga-nzambi manisaka diskure na yandi, Mingjie kwendaka kuyula yandi zina ya mukanda yina yandi bakaka mambu ya yandi vandaka kutuba. Ntangu nganga-nzambi songaka yandi nde yo kele Biblia, Ndinga ya Nzambi, Mingjie waka mpusa ya ngolo ya kutanga yo. Yandi sumbaka Biblia ya Kishinwa. Bo sonikaka Biblia yango na bisono ya bifwa-meso. Yandi tangaka bavolime 32 ya Biblia yina na bangonda 6. Ntangu yandi vandaka kutanga, Mingjie kwisaka kuzaba nde dilongi ya butatu busantu (dilongi yina bo longaka yandi na eglize) vandaka luvunu mpi nde Nzambi kele ti zina: Yehowa.

 Na nima, bikalulu ya bantu ya eglize ya Mingjie lembisaka yandi nitu. Yandi monaka nde bo vandaka ve kusadila mambu yina yandi vandaka kutanga na Biblia. Mu mbandu, bantu ya eglize na yandi vandaka kupesa bantu yina ke monaka mbote bima ya kudia kaka ntangu bo me manisa kulamba, kansi bo vandaka kupesa bifwa-meso bima ya kulala yina vandaka kubikala. Mambu yina ya mbi pesaka yandi mawa. Yandi yantikaka kusosa ba-eglize ya nkaka pene-pene ya kisika yina yandi vandaka. Yo yina yandi vandaka kulomba Nzambi nde yandi sadisa yandi na kuzwa dibundu ya kieleka.

 Mutindu Yanmei sadilaka yandi mambu na mawete simbaka kibeni ntima ya Mingjie. Yo yina yandi ndimaka nde Yanmei kulonga yandi Biblia. Na nima yandi kwendaka sambu na mbala ya ntete na lukutakanu ya Bambangi ya Yehowa. Yandi ke tuba nde: “Mono ta vilaka ve ata fioti lukutakanu yina. Bampangi-babakala mpi bankento pesaka mono mbote na kikesa bo yonso. Yo simbaka kibeni ntima na mono. Ata mono kele kifwa-meso, mono monaka nde kuna bo ke pona-ponaka ve.”

 Mingjie landaka kulonguka na kuzaba mbote-mbote Yehowa mpi yandi kumaka kukwenda mbala na mbala na balukutakanu. Yandi ke zolaka kuyimba bankunga ya Kimfumu, kansi yo vandaka mpasi sambu na yandi sambu mukanda ya bankunga ya Kimfumu ya Kishinwa na bisono ya bifwa-meso vandaka ve. Kansi dibundu sadisaka yandi na kusala mukanda na yandi mosi ya bankunga ya Kimfumu. Yandi salaka bangunga 22 sambu na kusonika na bisono ya bifwa-meso bankunga 151. Na ngonda ya Aprili 2018, Mingjie kumaka longi ya nsangu ya mbote (nsamuni). Yandi yantikaka kusala bangunga kana fioti 30 konso ngonda na kisalu ya kulonga nsangu ya mbote.

 Sambu na kusadisa Mingjie na kudibongisa sambu na bangiufula yina bo ke yulaka bantu na ntwala ya kubaka mbotika, Yanmei kotisaka ndinga na apareyi. Yo vandaka ndinga ya kitini mosi ya mukanda Beto Me Vukana Sambu na Kusala Luzolo ya Yehowa. Na ngonda ya Yuli 2018, Mingjie bakaka mbotika. Yandi ke tuba nde: “Zola yina bampangi-babakala mpi bampangi-bankento monisilaka mono na lukutakanu yina ya distrike simbaka kibeni ntima na mono. Mono vandaka na kiese ya mingi mpi mono dilaka sambu mono kumaka na dibundu ya kieleka ya Nzambi.” (Yoane 13:34, 35) Ntangu yai, Mingjie ke longaka nsangu ya mbote ntangu yonso. Mutindu bo zolaka yandi mingi, yandi me bakaka lukanu ya kumonisila mpi bantu ya nkaka zola ya mutindu mosi.