Muntu mosi tinaka Érythrée na 2011 mpi kwendaka na Norvège. Ntangu Bambangi ya Yehowa solulaka ti yandi, yandi songaka bo nde yandi kutanaka ti Bambangi ya Yehowa na bwala na bo. Yandi tubaka nde, ntangu yandi vandaka soda kuna, yandi monaka Bambangi ya Yehowa yina bo kangaka sambu na lukwikilu na bo ke buya kundima kukota na kisalu ya kisoda, ata ntangu bo vandaka kuniokula bo.

 Diambu mosi ya kukonda kukana salamaka na luzingu na yandi. Bo kangaka yandi mpi bo kotisaka yandi na boloko. Ntangu yandi vandaka na boloko, yandi monaka Bambangi ya Yehowa tatu: Paulos Eyasu, Negede Teklemariam, mpi Isaac Mogos. Bo me kangaka bampangi yai banda 1994 sambu na lukwikilu na bo.

 Ntangu muntu yai vandaka na boloko, yandi monaka yandi mosi nde Bambangi ya Yehowa ke sadilaka bansiku ya Biblia yina bo mosi ke longaka bantu. Yandi monaka nde bo kele bantu ya masonga mpi nkutu bo ke pesaka bantu ya nkaka ya boloko madia na bo. Yandi monaka mutindu Bambangi ya Yehowa yango ya vandaka mpi na boloko vandaka kulonguka Biblia na bumosi konso kilumbu mpi vandaka kulomba bantu ya nkaka na kukwenda kulonguka ti bo. Mukanda mosi vandaka kutuba nde bo sonika nde bo ke zola diaka ve kusadila Yehowa. Bo songaka bo nde kana bo tula siniatire na mukanda yina, bo ta basika na boloko. Kansi bo buyaka.

 Mambu yina muntu yai monaka yitukisaka yandi mingi mpi ntangu yandi vutukaka na Norvège, yandi sosaka kuzaba sambu na nki Bambangi ya Yehowa kele ti lukwikilu ya ngolo mutindu yina. Yo yina, ntangu Bambangi ya Yehowa kutanaka ti yandi, yandi yantikaka mbala mosi kulonguka Biblia ti bo mpi kuvukana ti bo na balukutakanu.

 Na Septembri 2018, yandi bakaka mbotika mpi kumaka Mbangi ya Yehowa. Ntangu yai, yandi ke sadilaka mabaku yonso yina yandi kele ti yo sambu na kusolula ti bantu yina ke katuka na Érythrée mpi na Soudan. Yandi ke siamisa bo na kulonguka Biblia sambu na kukumisa lukwikilu na bo ngolo.