Artur kele nkengi mosi ya nziunga na Arménie. Yandi kwendaka kutala dibundu mosi ya Bambangi ya Yehowa. Bo songaka yandi nde bampangi ya dibundu yina me longaka ntete ve na bisika ya bantu mingi. Kulonga mutindu yai ke lombaka mpi kusadila bashario ya bo ke tulaka mikanda yina ke tendulaka Biblia. Sambu na kupesa bampangi kikesa ya kulonga mutindu yina, Artur ti nkento na yandi Anna mpi mpangi-bakala ya nkaka na zina ya Jirayr tulaka shario mosi na mbanza mosi ya fioti. Bo ponaka kisika mosi ya bantu mingi ke lutaka.

 Bantu yina vandaka kuluta vandaka mbala mosi kusepela ti kieleka mpi kubaka mikanda. Kansi na nima, bantu yina ke zolaka beto ve yantikaka mpi kumona shario yina. Mimpe zole pusanaka pene-pene ya shario yango, ebuna mumpe mosi, bulaka shario yango dikulu kukonda kusonga bampangi yina ata kima. Na nima, yandi bulaka Artur mbata na ilungi mpi losaka balinete na yandi na ntoto. Artur, Anna mpi Jirayr salaka yonso sambu na kulembika makasi na yandi, kansi yo simbaka ve. Mimpe yina ya nkaka zolaka kubuka shario yina mpi mikanda panzanaka. Mimpe yango tubaka mambu ya mbi sambu na Bambangi ya Yehowa mpi bo kebisaka bo. Na nima, bo kwendaka.

 Artur, Anna mpi Jirayr kwendaka na biro ya bapolisie sambu na kusonga bo mambu yina. Bo songaka bo mambu yina salamaka mpi na bunkufi bo songaka bamfumu ya bapolisie ti bapolisie yina vandaka pana mambu ya me tala Biblia. Bo kotisaka bampangi yina tatu na biro ya mfumu ya bapolisie yina ke tadilaka mambu yina. Ntete yandi sosaka kuzaba mambu yonso mutindu yo lutaka. Kansi ntangu yandi zabaka nde ata Artur kele ngolo kansi yandi vutulaka ve ntangu mumpe yina bulaka yandi mbata, mfumu yai bikaka kuyula bangiufula sambu na mambu yina salamaka mpi yandi kumaka kusosa kuzaba mambu yina Bambangi ya Yehowa ke ndimaka. Yo salaka nde bampangi kusolula ti mfumu yai bangunga iya. Mambu yina mfumu yai waka yitukisaka yandi mpi yandi tubaka nde: “Dibundu yai kele kibeni dibundu ya nene! Beno salaka kibeni mbote!”

 Kilumbu ya kulanda, ntangu Artur vutukaka sambu na kulonga na kisika yina ya bantu mingi, muntu mosi ya monaka mambu yina salamaka kilumbu yina lutaka kwisaka pene-pene na yandi. Muntu yina sikisaka Artur sambu yandi bikalaka pima mpi nwanaka ve ti mimpe yina. Yandi tubaka diaka nde mambu yina yandi monaka salaka nde yandi zitisa diaka ve mimpe.

 Na nkokila, mfumu ya bapolisie bingaka Artur na biro na bo. Kansi na kisika ya kutubila mambu yina salamaka, yandi yulaka Artur bangiufula mingi na yina me tala Biblia. Bapolisie ya nkaka zole kwisaka mpi sambu na kuwa masolo yina.

 Kilumbu ya kulanda, Artur kwendaka diaka kutala mfumu yina ya bapolisie. Mbala yai, yandi kwendaka kusonga yandi bavideo na beto yina ke tubilaka Biblia. Mfumu yina bingaka bapolisie ya nkaka sambu na kukwisa kutala mpi bavideo yina.

 Mambu ya mbi yina mimpe salaka pesaka bapolisie dibaku ya kuwa nsangu ya mbote sambu na mbala ya ntete. Yo sadisaka bo na kumona nde Bambangi ya Yehowa kele bantu ya mbote.