Ntangu Zarina bakaka mbotika mpi kumaka Mbangi ya Yehowa, yandi katukaka na Russie mpi vutukaka na insi na bo na Asie Centrale. Yandi bakaka lukanu ya kulonga bana na yandi ya bankento mambu yina yandi ke ndimaka. Kansi yandi vandaka ve ti mbongo mingi, yo yina yandi vandaka kuzinga na nzo mosi ya fioti ti bibuti na yandi, mpangi na yandi ya bakala mpi nkento na yandi. Bibuti na yandi buyisaka yandi na kulonga bana kieleka ya kele na Biblia. Bo songaka mpi bana na yandi nde bo fwete solulaka ve mambu ya me tala Biblia ti mama na bo.

 Zarina yindulaka mingi sambu na kuzaba mutindu yandi lenda sadisa bana na yandi na kuzaba Yehowa. (Bingana 1:8) Yo yina yandi sambaka Yehowa ngolo, yandi lombaka lutwadisu mpi mayele na yandi. Zarina salaka mambu yina yo lombaka nde yandi sala sambu mambu ya yandi vandaka kulomba na kisambu kusalama mutindu yina. Yandi vandaka kutambula ti bana na yandi mpi kusolula ti bo mambu ya kuyituka yina Yehowa me salaka. Mutindu yandi vandaka kukwenda kutambula ti bana na yandi sadisaka bana na kutudila Ngangi dikebi.

 Na nima, Zarina sosaka mutindu yandi lenda longa bana na yandi mambu mingi ya nkaka. Sambu na yo, yandi vandaka kusadila mukanda Inki Biblia Kelongaka Mpenza? a Yandi vandaka kusonika baparafe mpi bangiufula na bitini ya bapapie kaka mutindu yo kele na mukanda yango. Yandi vandaka mpi kusonika mwa batendula sambu na kusadisa bana na yandi na kubakisa malongi mbote. Na nima yandi vandaka kubumba bitini ya bapapie yina ti kreyo na shambre yina bana vandaka kuyobila, na nsi ya mashini ya kuyobisila bilele. Ntangu bana na yandi vandaka kukota na shambre yina, bo vandaka kutanga baparagrafe yina mpi kusonika bamvutu na bo.

 Na nzila ya metode yina, Zarina longukaka ti bana na yandi bakapu zole ya mukanda Biblia Kelongaka na ntwala nde bo kwenda kuzinga kisika ya nkaka. Ntangu bo kumaka kuna, ata kima mosi ve lendaka diaka kukanga yandi nzila ya kusansa bana na yandi mutindu yandi vandaka kuzola. Na Oktobri 2016, bana yina zole ya bankento bakaka mbotika. Bo vandaka na kiese mutindu mama na bo vandaka mayele mpi vandaka ve kusonga bantu mambu yina yandi vandaka kusala sambu na kulonga bo kieleka na yina me tala Nzambi.