Rachel me kumaka kuzinga na République dominicaine. Yandi ke tuba nde: “Ntangu mono butukaka, bibuti na mono vandaka kusadila Yehowa. Kansi diambu ya mawa kele nde, ntangu mono lungisaka bamvula 7, papa kumaka mbeni ya ngolo ya kieleka. Yandi kumaka kukanga mono nzila ya kusambila Yehowa. Mu mbandu, yandi vandaka kutuba nde yandi ta pesa mono bima bonso telefone, yandi ta tinda mono nzietelo na Disneyland, to nkutu ta pesa mono karti ya banki kana mono me bika kusadila Yehowa. Bantangu ya nkaka, yandi vandaka nkutu kubula mono makofi sambu mono yambula kusadila Yehowa. Yandi vandaka kutuba nde kana mono kuka diaka ve kutuba mpi kutambula, mono ta kuka mpi ve kukwenda na balukutakanu. Kansi mambu yina kangaka mono ve nzila. Mono vandaka kaka ti lukanu ya kukwenda na balukutakanu.

 “Papa vandaka kuzikisa nde ntangu yandi ta bula mono, mama kuvanda ve. Yandi songaka mono nde, yandi ta sala mama mbi kana mono songa yandi nde yandi ke bulaka mono. Yandi vandaka kukusa nde, batashe yina mono vandaka ti yo na nitu vandaka kukatuka na ngalasisi ya bo ke bingaka arts martiaux ya yandi ke longaka mono.

 “Mono vandaka leke mingi mpi mono vandaka kuwa boma sambu na kusonga mama mambu yina vandaka kuluta. Yo yina mono vandaka kusonga yo Yehowa. Mono vandaka kutambula mingi na kati-kati ya banti yina vandaka na nima ya nzo na beto na Maryland na États-unis. Na banti yango, yo vandaka ti nti mosi ya kitoko ya bo ke bingaka chêne. Mono vandaka kumata na nti yango yina. Mono vandaka kuvanda na lutangu ya mbote. Ebuna, mono vandaka kusolula ti Yehowa. Mono vandaka kusonga yandi mutindu mono vandaka kudiwa mpi mambu yina mono ta sala sambu na yandi ntangu mono ta yela kana yandi sadisa mono na kuvanda na luzingu tii kuna mono ta kuma mbuta. Mono vandaka mpi kusonga yandi mambu yina mono ta sala na nsi-ntoto ya mpa yina ke kwisa, dibuta yina mono ta vanda ti yo, mpi ngemba ti kiese yina mono ta vanda ti yo kukonda kuwa mpasi mpi kukonda kuwa boma.

 “Ntangu papa vandaka kusala yonso sambu mono yambula Yehowa na mpila yandi vandaka kupesa mono bima mpi kubula mono, mono vandaka ntangu yonso kumona mutindu Yehowa vandaka kukitisa mono ntima mpi kupesa mono kikesa. Nzambi sadisaka mono na kubikala ya kukangama ti yandi mpi na kulanda kuvanda kikesa.

 “Mono bakaka mbotika ntangu mono lungisaka bamvula 10 mpi mono yantikaka kisalu ya kimupasudi-nzila bamvula zole na nima. Ntete papa vandaka ve kuzaba mambu yai yonso. Ntangu yandi zabaka yo, yandi bulaka mono makofi mpi mbwanga na mono kwendaka na lweka.

 “Bantu ya nkaka vandaka kusonga mono nde mono kele leke mingi sambu na kusala kisalu ya kimupasudi-nzila, mpi bo vandaka kutuba nde mono vandaka ve kubakisa bunene ya lukanu yina mono bakaka. Mono vandaka kumona bana ya nkaka ya vandaka Bambangi ya Yehowa ke kudipesa ve mingi na kusadila Yehowa. Bo vandaka kudipesa na bafeti mpi na bansaka. Mambu ya bo vandaka kusala, vandaka kumonana mambu ya mbote. Bantangu ya nkaka, mono vandaka kuzola kusala mambu yina bo vandaka kusala. Mono kudiyulaka nde, ‘Keti mono fwete yambula kulonga nsangu ya mbote mpi kusala bansaka bonso bana ya nkaka ya mvula na mono?’ Kansi konso mbala ya mono vandaka kudiwa mutindu yina, mono vandaka kusonga yo Yehowa.

 “Ntangu mono lungisaka bamvula kiteso ya 15, muntu mosi ya me zabanaka mingi mpi ya vandaka kusala na kimvuka mosi (agence de mannequins) ya lukumu kwisaka kusosa mono. Bo songaka mono nde bo ta futa mono mbongo mingi kana mono ndima kukwenda kusala kisalu ti bo na Milan na insi Italie. Mono kudiwaka mbote mutindu bo songaka mono nde mono ta kuma mbandu, bo ta tulaka mono na bazulunalu mpi mono ta lwataka bilele ya ntalu ntangu bo ta sadilaka mono sambu na kupusa bantu na kusumba bilele. Mono vandaka dezia mupasudi-nzila ya ntangu yonso kiteso ya bamvula tatu mpi mono kuditubilaka nde: ‘Kisalu yai lenda pesa mono mbongo ya me fwana sambu mono landa kuvanda mupasudi-nzila ntangu ya nda!’ Papa yambulaka beto, yo yina mono yindulaka nde mbongo yina lenda sadisa mpi sambu na kusala badepanse ya mama.

 “Mono sambaka Yehowa sambu na diambu yina. Mono solulaka ti mama. Yandi vandaka mupasudi-nzila banda bamvula mingi. Mono solulaka mpi ti nkuluntu mosi ya zola mpi ya bampangi vandaka kuzitisa mingi. Kaka mutindu mono vandaka kusala yo, mono vandaka kukwenda na nti na mono mpi mono vandaka kusamba mingi. Yehowa pesaka mvutu na bisambu na mono. Yandi sadilaka nkuluntu yina sambu na kusonga mono verse mosi na Biblia. Yo kele Longi 5:4. Yo ke tubaka nde: ‘Kana nge sala lusilu na Nzambi, lungisa yo. Lusilu ya nge me sala, lungisa yo.’ Mono songaka Yehowa nde mono ta sadila yandi ntangu yonso, mpi mono bangaka nde, kisalu yina bo ke zola kupesa mono, lenda bebisa kinduku na mono ti Yehowa. Mono bakaka lukanu ya kubuya yo.

 “Ata mono kutanaka ti bampasi mingi ntangu mono vandaka leke, mono fwaka ve. Sesepi, mono ke zingaka na kiese ti bakala na mono Jaser mpi ti mwana na beto Connor. Yandi kele ti bamvula 9. Jaser kele nkuluntu mpi Connor kele nsamuni yina me bakaka ntete ve mbotika. Mono me salaka kiteso ya bamvula 27 na kisalu ya ntangu yonso.

 “Mono ke yindulaka mbala na mbala masolo ya nda yina mono vandaka kusolula ti Yehowa na nti yina na kati-kati ya banti na nima ya nzo na beto. Mono vandaka kubondila Yehowa sambu yandi sadisa mono, ebuna yandi sadisaka mono na mutindu ya kuluta mbote. Yandi pesaka mono kikesa, yandi kitisaka mono ntima mpi yandi twadisaka mono. Na luzingu na mono ya mvimba, Yehowa me monisaka mono mbala mingi nde yandi kele tata ya kuluta mbote. Mono kele na kiese mutindu mono me ponaka kusadila yandi na ntima na mono ya mvimba. Yo kele lukanu ya kuluta mbote yina mono me bakaka.”