Na Septembri 25, 2021, Biblia—Evanzile ya Matayo basikaka na ndinga Hmong na format yina beto ke sadilaka na baapareyi. Mpangi Geoffrey Jackson ya Nto-Kimvuka salaka diskure ya kubasika ya mukanda yai ya Biblia. Bo songaka manaka yai na ntoto ya mvimba sambu na bantu kuluta 2 500 yina landaka yo na nzila ya video.

Yai mukanda ya ntete ya Biblia—Mbalula ya Nsi-Ntoto ya Mpa ya me basika na ndinga Hmong yina bantu kuluta bamilio 3,9 ke tubaka yo na ntoto ya mvimba. a Mutindu yo kele kikalulu na bo, bantu ya ndinga Hmong ke kwikilaka nde bima ya kele na lugangu, mu mbandu matadi ti banti to lugangu yo mosi ke vandaka ti luzingu mpi nde bantu fwete sambila yo (animisme). Bo ke kwikilaka mpi nde bampeve ya mbote mpi ya mbi ke twadisaka nsi-ntoto yai mpi nde bantu ya ke sadilaka ngolo ya bampeve bantu ke twadisaka bampeve yai (chamanisme).

Na nima ya mvula 1970, bantu mingi ya ndinga Hmong tinaka insi na bo mpi bo kwendaka na ba camp ya insi Thaïlande. Nsuka-nsuka, bantu ya nkaka na kati ya bantu yai ya tinaka insi na bo, kwendaka na bansi ya Europe mpi bantu mingi na kati na bo kwendaka na États-Unis.

Bubu yai, bantu ya ndinga Hmong yina kele na États-Unis ke zingaka na provense ya Californie, ya Minnesota mpi ya Wisconsin. Bambangi ya Yehowa yantikaka kusala kisalu ya kubalula mikanda na ndinga Hmong na 2007. Na 2012, bo tungaka biro mosi ya bo ke balulaka mikanda na mbanza Sacramento na provense ya Californie.

Bampangi ya ke salaka kisalu ya kubalula mikanda manisaka kubalula mukanda ya Matayo na nima ya bangonda tatu. Kimvuka mosi ya bampangi ya bansi tanu sadisaka bo na kutanga yo mpi na kutala kana yo kele ti bifu yina bo fwete yidika na ntwala nde mukanda yango kubasika.

Bampangi ya ke salaka kisalu ya kubalula mikanda kutanaka ti diambu mosi ya mpasi mpenza na ndinga na bo. Ndinga Hmong, yina bo kumaka kusadila na mikanda mpi kusonika yo na nima ya mvula 1950, ke sadilaka ve bisono ya mbuta (majuscule) mpi yo ke vandaka ve ti bansiku ya ortographe.

Babiblia ya ntete na ndinga Hmong basikaka na nima ya mvula 1980, kansi bantu mingi ya ke tubaka ndinga yai vandaka ve ti mbongo ya kusumba Babiblia yai sambu yo vandaka ntalu mingi. Diaka, Babiblia yango vandaka ve kutubila mambu ya nkaka mutindu yo kele. Yo yina mpila bantu kubakisa mbote-mbote mambu yonso ya kele na Biblia vandaka ve. Mu mbandu, Biblia mosi katulaka zina ya Nzambi, Yehowa mpi yingisaka yo na zina ya muntu mosi yina bantu mingi ya ndinga Hmong vandaka kusadila na mwanda-mwanda to istware mosi ya zabanaka mingi.

Mpangi mosi ya ke salaka kisalu ya kubalula mikanda tubaka nde: “Ntangu yai, Biblia—Mbalula ya Nsi-Ntoto ya Mpa ta sadisa bantu ya ntima ya masonga na kutanga zina ya Nzambi na Biblia na bo mosi mpi na kukuma banduku na yandi. Beto vandaka kuvingila yo banda ntama mpi banda bamvula mingi beto vandaka kusamba sambu na yo.”

Bantu yina tangaka mukanda yai ya Biblia monisaka ntonda na bo sambu bampangi balulaka Biblia yai kitoko mingi. Mosi na kati ya bantu yina tangaka yo ke tuba nde: “Mono yitukaka mingi ntangu mono tangaka mukanda ya Matayo na ndinga Hmong. Mukanda yai ya Biblia vandaka kupesa mono kiese mingi kibeni! Mono kumaka kumona na mabanza mutindu mambu ya mono vandaka kutanga vandaka kusalama.”

Kubasika ya mukanda ya Matayo na ndinga Hmong ke monisa kibeni nde Nzambi na beto ya ke pona-ponaka ve ta landa kusala yonso sambu bantu yonso ya ke sosaka yandi kutanga Ndinga na yandi.—Bisalu 10:34, 35.