Na Kitanu 12 août 2022, beto manisaka kitini ya ntete ya kufilime Kitini 1 ya filme Disolo ya Kisalu ya Yezu. Na nima ya kupema mwa fioti, beto ta yantika kitini ya zole ya kufilime filme yai mpi beto ta manisa yo na ngonda ya octobre 2022.

Na rapore mosi ya bo katukaka kupesa beto, bo songaka beto nde bampangi yantikaka kufilime Disolo ya Kisalu ya Yezu na Kitanu 20 mai 2022 mingi-mingi na kati. Na ntangu yina, beto vandaka ve ti banswa sambu na kutunga bitini ya nkaka ya nzo mosi ya nene yina bo tulaka sambu na kubumba bima mpi bima ya nkaka ya ntama na nganda. Beto bakaka banswa yina na Kitanu 15 juillet 2022. Na nima, departema ya ke talaka mambu ya kutunga ya kele na Betele ya Australasie pesaka nzo yina ya nene mpi kisika ya kusala filme yina na ekipe ya ke talaka mambu ya bavideo. Sesepi, bo ke sadila dezia bisika yina sambu na kufilime filme yango.

Bavolontere kuluta 500 ya Australasie mpi ya Nouvelle-Zélande pesaka maboko na kisalu yina ya kutunga kisika yina vandaka bametre kuluta 7 000 kare mpi kuyidika yo bonso bisika ya ntangu ya ntama. Na yina me tala kisalu yango, mpangi Russell Grygorcewicz yina kele mutambusi ya komite ya kisalu ya kutunga ke tuba nde: “Beto kutanaka ti mambu ya mpasi, kansi beto monaka pwelele nde Yehowa sadisaka beto na kununga yo. Ntembe kele ve nde, beto nungaka kusala kisalu yina kaka na nsadisa ya mpeve ya Yehowa.”

Mpangi Ronald Curzan, nsadisi na Komite Sambu na Kulonga vandaka pana ntangu yonso yina kisalu ya kufilime filme yango vandaka kusalama. Yandi tubaka nde: “Kuwakana mpi kinduku ya mbote na kati ya bavolontere ya kisalu ya kutunga mpi ya bampangi ya dibuta ya Betele monanaka kibeni pwelele. Yo kele mpi mbote na kumona mutindu bisika yai me kuma na nima ya kuyidika mambu mpi ya kutunga na nima ya bamvula mingi. Diaka, lusadisu ya mingi ya bampangi-babakala mpi bankento ya teritware ya filiale ke pesa kibeni kiese. Ntembe kele ve nde, filme yai ya bitini 18 ya ta tubila luzingu ya Yezu mpi malongi na yandi ta simba ntima ya bantu ya ntoto ya mvimba.”

Mpangi Kenneth Cook ya Nto-Kimvuka vandaka mpi pana na bilumbu ya nsuka ya bo vandaka kufilime Kitini 1 ya filme yai. Yandi tubaka nde: “Yo kele pwelele nde Yehowa Tata yina ke zolaka beto ke sadisa sambu kisalu yai kusalama. Beto ke pesa yandi mersi mpi bantu yonso yina me pesa maboko sambu na kuyidika bisika yai mpi kufilime filme yai mutindu me kudipesa mpi me sala kisalu yai ti ntima ya kufuluka na zola. Beto ke samba sambu bavideo yai ya kulandana ya me basikaka ntete ve, kusadisa bantu mingi na kulanda diaka mbote-mbote Yezu mpi na kupusana pene-pene ya Yehowa.”