Na Afrique du sud, bantu yina ke sadisaka bifwa-makutu pesaka Bambangi ya Yehowa mersi mutindu bo ke basisilaka bifwa-makutu bavideo ya kitoko na Ndinga ya Bidimbu ya Afrique du Sud yina ke sadisaka bo na kuyidika luzingu na bo. Na Kintete 15 novembre 2021, beto basisaka mukanda ya Bagalatia mpi ya Baefezo ya Biblia—Mbalula ya Nsi-Ntoto ya Mpa ya Masonuku ya Kigreki ya Bukristu na Ndinga ya Bidimbu ya Afrique du Sud. Beto me kuma ti mikanda ya Biblia kumi ya me basika na Ndinga ya Bidimbu ya Afrique du sud. Mikanda ya nkaka iya ya Biblia ta basika na ngonda ya Avril 2022. Mikanda yina yonso kele na jw.org mpi na aplikasio JW Library na Ndinga ya Bidimbu.

Minna Steyn kele kilandi ya luyalu ya Cap-Occidental mpi muntu ya me zaba mbote-mbote (spécialiste) mambu ya kulonga. Yandi me sikisa Bambangi ya Yehowa mpi me tuba nde: “Mono ke sepelaka kibeni kutala bantu yina ke salaka bidimbu mpi mono ke losila bo bintuntu, bo ti organizasio na bo, sambu bo ke salaka bidimbu ya mbote kibeni.”

Bongani Makama kele ntwadisi ya Kimvuka mosi ya Bantu Yina Kele ti Bifu na Nitu ya Swaziland (Eswatini). Yandi mpi tubaka nde: “Beto ke losila Bambangi ya Yehowa bintuntu sambu bo ke sala ngolo, sambu bifwa-makutu mpi bantu yina ke waka mbote ve kuvanda ti bima yina bantu ya ke waka kele ti yo.” Yandi tubaka diaka nde: “Yo me fwana nde bifwa-makutu kuvanda ti Biblia na ndinga na bo. Yo yina beto ke sikisa Bambangi ya Yehowa mutindu bo me basisa mikanda yai ya Biblia ya bo me balula na ndinga ya ntima na bo. Beto ke vingila ti nzala ya ngolo nde mikanda yonso 66 ya Biblia kubasika na ndinga ya bidimbu.”

Na Afrique du Sud, bantu kiteso ya 450 000 ke tubaka Ndinga ya Bidimbu ya Afrique du Sud. Bambangi ya Yehowa ya ke longaka nsangu ya mbote mpi ya kele bifwa-makutu to bantu ya ke waka ve mbote kele 283 na Afrique du Sud. Bikesa ya Bambangi ya Yehowa ke sala nde “bantu ya mitindu yonso” kuzaba mambu ya siki-siki ya me tala kieleka. Na kati na bo, beto lenda tanga bifwa-makutu yina kele na teritware yina Betele ya Afrique du Sud ke twadisaka bisalu.—1Timoteo 2:4.