Mutindu bo tubilaka yo dezia na bansangu, na Kiya 9 mars 2023, muntu mosi bulaka bantu ya kwisaka na lukutakanu ya kati-kati ya mposo na nzo ya Kimfumu ya Hambourg-Winterhude masasi. Mambu yai salamaka na nsuka ya lukutakanu. Bampangi na beto mingi ya babakala mpi ya bankento fwaka mpi lwalaka. Mambu yai manaka ntangu basoda kwisaka na Nzo yina ya Kimfumu. Na nima muntu yina bulaka bantu masasi kudifwaka. Bambangi ya Yehowa ya Allemagne mpi ya ntoto ya mvimba ke pesa mersi sambu na mambu ya mbote, ya ke monisa zola mpi kuditula na kisika ya bantu ya nkaka yina bamfumu ya Allemagne, ba-organizasio mpi bantu ya nkaka na ntoto ya mvimba tubaka.

• Diambu ya mawa kele nde bampangi-babakala 4 mpi bampangi-bankento 2 ti mwana yina mpangi-nkento mosi vandaka ti yandi na divumu fwaka

• Bampangi-babakala 2 mpi bampangi-bankento 7 lwalaka

• Mimonisi ya Betele ya Europe centrale, bampangi yina ke kwendaka kutala mabundu (bankengi ya nziunga) mpi bankuluntu ya mbanza yina ke pesa bampangi kikesa mpi lusadisu

Beto kele na dibuta ya bampangi ya ntoto ya mvimba ya ke vandaka na bumosi. Beto ke samba sambu na bampangi yonso yina mpasi yai me bwila. Yehowa kele “kisika ya ngolo ya lutaninu na kilumbu ya mpasi,” mpi yandi ta sadisa beto na kukanga ntima na bantangu yai ya mpasi awa ya beto ke landa kusambila yandi na ngemba yonso.—Nahumi 1:7.