Na juin 2022, beto ta yantika bisalu ya kuyidika nzo mosi ya nene ya baetaze tatu yina ta kuma mpi bisika ya kulala mpi babiro sambu na bampangi ya nkaka ya dibuta ya Betele ya Angola. Bo manisaka kutunga Betele ya kele kuna bubu yai na 2003. Yo kele diaka ve ti bisika ya me fwana sambu na kutula bampangi yonso 207 ya dibuta ya Betele.

Beto kele na mfunu ya bisika ya nkaka sambu bubu yai, bampangi ya nkaka ya dibuta ya Betele ke lalaka na banzo yina organizasio ke futilaka. Bampangi sumbaka nzo yai ya nene na décembre 2021. Nzo yai kele ve ntama ti Betele ya beto ke sadilaka dezia.

Nzo yai ya nene ya beto ke yidika ta vanda ti babiro 60 mpi bisika ya kulala 57 mpi bisika yango ya kulala ta vanda ti bashambre mpi basalo na yo. Nzo yina ya nene ta vanda ti babiro ya pululu na balweka na yo mpi babiro ya nkaka ya kukanga na balweka na yo. Diaka, beto ta yidika mpi bisika ya kusala balukutakanu mpi mambu mingi ya nkaka. Sambu na kusala bibaka ya babiro, beto ta tula bima yina bo ke bingaka cloisons amovibles yina beto lenda katula, kuvutula diaka to mpi kunata na bisika ya nkaka na kutadila mpusa yina beto kele na yo.

Bampangi ya dibuta ya Betele yina kele bubu yai na banzo yina organizasio ke futilaka fwete kwenda kukota na nzo yina ya mpa na février 2024.

Mpangi Samuel Campos ya Komite ya Filiale ya Angola, ke tuba nde: “Beto sambaka mpi beto salaka diboko na diboko ti Departema ya Ke Talaka Kisalu ya Kutunga na Ntoto ya Mvimba sambu na kumanisa mpasi yai ya bisika fioti ya beto kele ti yo. Nzo yai ya nene ya beto me sumba mpi ke yidika kele mvutu yina Yehowa me pesa na bisambu na beto.”

Bansamuni kele kuluta 160 000 na Angola. Bantu kuluta 400 000 kwendaka na Nkinsi ya Kuyibuka Lufwa ya Yezu na mvula ya me luta mpi bansamuni longukaka Biblia ti bantu kuluta 200 000. Beto ke ndima nde Yehowa ta sakumuna bisalu ya kuyidika nzo yai ya nene yina ta sadisaka sambu kisalu ya Kimfumu kulanda kukwenda na ntwala.—1 Bansangu 29:16.