Dibuta ya Betele ya Argentine me katuka kukota na banzo ya mpa yina bo me tungila bo. Kompani mosi manisaka kutunga yo na nsungi ya été ya 2021. Banda pana, bampangi ya Betele mpi bavolontere ya ke salaka kisalu ya kutunga ke landa kusala bisalu ya fioti-fioti na kati ya banzo yango. Mu mbandu bo ke sala montage ya bakiti, bamesa, bambeto ti bima ya nkaka mpi bo ke sala bisalu ya kutula bunkete, ya kutula kura, ya kutula batiyo ya masa mpi kuyidika yo.

Betele yai ya mpa kele ti nzo mosi ya nene ya kele ti babiro yina kele ti bisika 136 ya kusala bisalu. Yo kele mpi ti banzo zole ya nene ya kulala yina kele ti bashambre 98. Bo tungaka banzo ya Betele yina ya ntama na bisika mingi. Na Betele yai ya mpa, bampangi ya Betele kele ti dibaku ya kulala mpi kusala kaka na kisika mosi. Kisika yai kele nene bametre 8 524 mpi yo kele na nganda ya Buenos Aires, nto-mbanza ya Argentine.

Mpangi Humberto Cairo ya Komite ya Filiale, ke tuba nde: “Yehowa monisaka kikalulu na yandi ya nene ya kukaba na kisalu yai. Banzo yai ya mpa kele kitoko mpenza. Yo kele ti kidimbu ya jw.org ya bo me tulaka na kisika ya bantu yonso lenda mona.”

Mpangi Sebastian Rosso ya Departema ya Kisalu, ke tuba nde: “Yai kele mpenza kado ya Yehowa me pesa beto. Yo kele kisika mosi ya me fwana sambu na kulungisa bampusa na beto. Beto ke pesa Yehowa mersi mingi sambu na Betele yai ya kitoko mpi ya me fwana sambu na kisalu.”

Beto ke ndima nde Betele yai ya mpa ta sadisa bampangi ya Betele na kusala diaka mbote bisalu mpi nde yo ta sadisa mpenza bantu ya kisika yina yo kele na kuzaba mambu ya mbote sambu na nkembo ya Yehowa.—2 Bansangu 7:1.