Banda na Mposo 20 mai tii na Lumingu 11 juin 2023, nsaka ya nkweso sambu na bana yina kele ti bamvula banda na 20 kita yina FIFA yidikaka sambu na ntoto ya mvimba salamaka na bambanza iya ya nene ya Argentine. Kiteso ya bantu 400 000 ya insi yai mpi ya bansi ya nkaka vandaka na nsaka yina. Yo salamaka bamposo tatu. Bo tulaka bashario ya mikanda na bisika ya kuswaswana mpi na bantangu ya kuswaswana. Kiteso ya bampangi-babakala mpi bankento 500 salaka kisalu yai ya kuta kimbangi na bisika ya bantu mingi mpi bo kabisaka mikanda kuluta 500. Bambangi ya Yehowa lombaka bantu mingi na kukota na site jw.org sambu na kubaka bamvutu na bangiufula ya bo ke kudiyulaka sambu na Biblia.

Bakala mosi ya ke zingaka na kartie yina pusanaka pene-pene ya shario mpi yandi tubaka nde yandi sepelaka kulanda emisio mosi ntangu yandi vandaka kusala ngalasisi. Mpangi-bakala mosi songaka yandi jw.org mpi yandi tendudilaka yandi mutindu yandi lenda baka mikanda ya kuwidikila na Internet. Bakala yina tubaka nde yandi ta kotisa mikanda na beto na lisiti ya bima yina yandi ke widikilaka.

Bo tandaka bashario na bandinga 9 sambu bantu mingi ya katukaka na bansi ya nkaka mpi ya kwisaka na nsaka yai kumona yo. Katula yo, bampangi mingi ya ke longaka nsangu ya mbote longukaka mutindu bo ke pesaka bantu mbote na bandinga ya mutindu na mutindu sambu na kusolula ti bayina ta pusana pene-pene ya bashario. Mpangi-bakala mosi ya kudipesaka na kisalu yina ya kuta kimbangi na kisika yina ya bantu mingi tubaka nde: “Bisalu yonso ya salamaka sambu na kuta kimbangi na bantu ya bansi ya mutindu na mutindu sadisaka mono na kumona nde Yehowa kele kibeni mawete mpi yandi ke pona-ponaka ve. Yo fulusaka mono kibeni ti kiese.”

Ya masonga yo ke yitukisa na kumona nde, bo pesaka Bambangi ya Yehowa nswa ya kutula bashario ya mikanda na bisika yina bo ke pesaka ve bantu ya ke kwenda na nsaka mosi buna nswa ya kuvukana. Bo ke salaka mpidina sambu na lutaninu. Muntu mosi ya vandaka na kati ya bantu yina yidikaka mambu sambu na nsaka yina tubaka nde, “Beto me zaba nde Bambangi ya Yehowa kele bantu ya ngemba mpi bo ke salaka ve bantu mbi.” Yo yina bo tubaka mambu ya mbote sambu na bantu yina ke taninaka bantu.

Kumona mutindu bansadi ya Yehowa ke sala bikesa sambu na kusolula ti bantu ya mitindu yonso mpi kukuna nkeni na yina me tala kieleka ya Kimfumu na ntoto ya mvimba ke pesa beto kibeni kikesa.—Longi 11:6.