Na Septembri 24, 2020, Tribinale ya Eropa ya Ke Nwaninaka Banswa ya Bantu bakaka balukanu zole ya mfunu sambu na mambote ya Bambangi ya Yehowa ya insi Azerbaïdjan. Lukanu ya ntete vandaka kutadila mambu ya Mpangi Valiev mpi ya Bampangi ya Nkaka ya Insi Azerbaïdjan. Lukanu ya zole vandaka kutadila Kimvuka ya Bambangi ya Yehowa ya Insi Azerbaïdjan. Bo bakaka balukanu yai sambu na kutanina banswa yina bampangi na beto kele ti yo ya kusambila Nzambi na kimpwanza.

Na mambu yai zole, bamfumu ya insi Azerbaïdjan ndimaka nde Leta fwaka nsiku yina ke pesaka bampangi na beto banswa yai. Mutindu bo zitisaka ve nsiku yango, Leta ndimaka kufuta bampangi na beto mbongo 19 000 euros (22 146 dollars américains). Balukanu ya Tribinale ya Eropa ya Ke Nwaninaka Banswa ya Bantu monisaka nde Tribinale yai ndimaka mambu yina Leta ya insi Azerbaïdjan tubaka.

Na 2011, bampangi kotisaka dosie ya Mpangi Valiev mpi ya Bampangi ya Nkaka ya Insi Azerbaïdjan na Tribinale ya Eropa ya Ke Nwaninaka Banswa ya Bantu. Dosie yango vandaka kutadila bampangi na beto ya mbanza Ganja. Banda bamvula mingi, bamfumu ya mbanza Gandja ke buyaka na kubasisa nsiku ya ke ndima bisalu ya bampangi na beto. Yo yina mbala mingi bapolisi vandaka kukanga Bambangi ya Yehowa ya mbanza Gandja nzila ya kusala balukutakanu yina bo vandaka kusala na ngemba. Bo vandaka kukanga bantu yonso yina vandaka na balukutakanu yango, bo vandaka kutula bo na boloko mpi bo vandaka kufutisa bankaka na kati na bo amande ya mbongo mingi. Mbala mingi bo vandaka kubedisa mpangi mosi mpi bo vandaka kufutisa yandi baamande ya mbongo 9 450 manats (11 375 dollars américains). Bo vandaka nkutu kukanga bampangi na beto ya nkaka sambu bo vandaka kukuka ve kufuta baamande ya mbongo mingi yina bo vandaka kulomba bo.

Na 2013, bampangi nataka dosie ya zole ya Kimvuka ya Bambangi ya Yehowa ya Insi Azerbaïdjan, na Tribinale ya Eropa ya Ke Nwaninaka Banswa ya Bantu sambu Leta ya insi Azerbaïdjan vandaka kundima ve nde Bambangi ya Yehowa kukotisa mikanda na bo ya nkaka na insi yai.

Bamfumu ya mbanza Gandja ke buya kaka na kubasisa nsiku ya ke ndima bisalu ya Bambangi ya Yehowa. Ata mpidina, mambu ya bampangi na beto me yilama kibeni. Banda na bamvula ya me katuka kuluta, bampangi na beto ke salaka balukutakanu na bimvuka ya fioti-fioti na banzo ya bampangi mpi bapolisi ke kangaka bo diaka ve nzila ya kusala yo. Diaka, ata Leta ke losaka ntete disu na mikanda na beto na ntwala ya kundima nde yo kota na insi Azerbaïdjan, bampangi na beto ke vandaka ti nswa ya kukotisa mikanda mingi.

Mpangi Kiril Stepanov, yina ke twadisaka bisalu ya Biro ya Ke Pesaka Bansangu sambu na Bambangi ya Yehowa ya insi Azerbaïdjan, ke tuba nde: “Beto ke tula ntima nde balukanu zole ya mfunu yina Tribinale ya Eropa ya Ke Nwaninaka Banswa ya Bantu me baka, ta pusa Leta na kubasisa nsiku ya ke ndima bisalu ya Bambangi ya Yehowa na mbanza Gandja mpi na bambanza ya nkaka ya insi Azerbaïdjan. Beto ke tula mpi ntima nde na bilumbu ke kwisa, Leta ta losaka diaka ve disu na mikanda na beto na ntwala ya kundima nde beto kotisa yo na insi Azerbaïdjan.”

Beto ke pesa Yehowa mersi mutindu yandi ke sadisa beto. Balukanu yai ya tribinale me baka sambu na mambote na beto, ke monisa diaka nde ‘ata kinwaninu mosi ve ya bo ta sadila sambu na kunwanisa bansadi ya Nzambi ta nunga.’—Yezaya 54:17.