Na Lumingu 27 mars 2022, mpangi Mats Kassholm ya Komite ya Filiale ya Birmanie salaka diskure ya kubasika ya Biblia—Mbalula ya Nsi-Ntoto ya Mpa na ndinga Karen Sgaw na format ya baapareyi. Bantu kiteso ya 620 landaka diskure yango na video. Beto ta basisa Biblia yai ya papie na avril 2022.

Bambangi ya Yehowa me kotaka na Birmanie banda na 1914 ntangu Balongoki ya Biblia ya ntete kumaka na insi yai. Nsamuni ya ntete ya ndinga Karen Sgaw bakaka mbotika na Birmanie na nima ya 1940.

Biblia—Mbalula ya Nsi-Ntoto ya Mpa ta sadisa mpenza bantu mingi sambu Babiblia ya nkaka na ndinga Karen Sgaw ke sadilaka bangogo yina ata muntu mosi diaka ve ke sadilaka, bangogo ya kele mpasi na kubakisa to yina ke basisaka ve bangindu mbote-mbote. Mu mbandu, Biblia mosi na ndinga Karen Sgaw ke balulaka kitini mosi ya Nkunga 72:16 nde “mwa bambuma na ntoto.” Kansi Biblia—Mbalula ya Nsi-Ntoto ya Mpa ke balulaka mbote-mbote mpenza verse yai nde “mbuma . . . mingi kibeni na ntoto.

Biblia yai ya mpa kele lusakumunu ya Yehowa sambu na bansamuni ya ke tubaka ndinga Karen Sgaw. Beto ke samba sambu yo sadisa bo na kulanda kuvanda ti lukwikilu ya ngolo.—1 Piere 5:10.