Mpangi Jean-Yves Mudaheranwa ti nkento na yandi Vastie ke sadisa bantu yina ke bela maladi ya coronavirus. Bo ke zingaka na Montréal na insi Canada. Mpangi Mudaheranwa kele doktere (inhalothérapeute) na lupitalu mosi, yandi kele doktere yina ke salaka ti apareyi yina ke sadisaka na kubaka mupepe ya nganda sambu na kukotisa yo na nitu ya muntu (spécialiste du système cardio-respiratoire) mpi nkento na yandi Vastie kele munganga na lupitalu mosi ya fioti yina ke sansa bantu ya kele ti COVID-19. Na ntangu yai ya bantu kele na boma ya ngolo mpi me fuluka ti basusi, mpangi yai ti nkento na yandi ke baka ngolo na Yehowa mpi ke baka mambote ya ‘ntima ya mbote’ yina Yehowa silaka.—Yezaya 65:14.

Mpangi Mudaheranwa ke tuba nde: “Banduku na mono ya kisalu ke wa boma, mono me monaka bo ntete ve mpidina.” Nkento na yandi ke tuba nde: “Kulonguka na beto mosi ke sadisa beto mingi. Beto ke tadila kidimbu ya bilumbu ya nsuka, mpi beto ke yibuka nde Yehowa kele ti beto mpi nde yandi ta yambula beto ve. Na ntwala ya kubasika na nzo mpi ya kuyantika kisalu, mono ke sambaka, na nima mono ke kumaka na ngemba.”

Mpangi Mudaheranwa ke tuba nde: “Mono butukaka na Rwanda mpi na ntangu yina bo vandaka kufwa bantu na luzolo yonso (génocide), mono me vandaka. Awa na Canada, beto me monaka ntete ve mambu ya mutindu yina, mpi beto lenda vila kukonda mpasi nde beto ke zinga na bilumbu ya nsuka. Na masonga yonso, bantangu ya nkaka mono mpi, mono vandaka kuyindula nde kilumbu ya Yehowa kele kibeni ve pene-pene. Maladi yai me ndimisa mono diaka mingi nde beto ke zinga na bilumbu ya nsuka mpi yo ke pusa mono na kundima diaka mingi mambu yina Biblia ke tubaka mpi nde mambu yina yo me tubaka na ntwala nde yo ta salama, ta lungana kibeni.”

Bambangi ya Yehowa ya ntoto ya mvimba ke ndimaka mpi na mambu yina mpangi Mudaheranwa ti nkento na yandi ke ndimaka, mpi bo ke landa kuvanda na ngemba na ntangu yai ya boma.—Yezaya 48:18.