Na Lumingu 5 juin 2022, mpangi Jason Reed ya Komite ya Filiale ya Chili salaka diskure ya kubasika ya Biblia—Mbalula ya Nsi-Ntoto ya Mpa ya Masonuku ya Kigreki ya Bukristu na ndinga Mapudungun. Bo basisaka Biblia yai ya papie mpi yina bo ke sadilaka na baapareyi. Mabundu ya ndinga Mapudungun landaka diskure yai ya bo kotisaka dezia ndinga na nzila ya video kaka na ntangu yina yo vandaka kusalama. Bantu kiteso ya 800 landaka diskure yango.

Bantu mingi yina ke tubaka ndinga Mapudungun (ba Mapuche) ke zingaka na centre mpi na sudi ya Chili mpi Argentine. Bansi yai kele na kati-kati ya océan Pacifique ti océan Atlantique. Bamfinda, ba volcan, ngumba ya bo ke bingaka cordillère des Andes mpi ba plaine ya nene kele na ntoto ya ba Mapuche. Ba Mapuche ke vandaka ti kikalulu ya kuyamba bantu mpi bo ke zitisaka mingi bima ya santu.

Bo me bandaka kubalula bitini ya Biblia na ndinga Mapudungun banda na 1901. Ebuna na 1997 kimvuka mosi balulaka Masonuku ya Kigreki ya Bukristu ya mvimba. Kansi ba Mapuche vandaka ti mfunu ya Biblia mosi ya bo me balula mbote kukonda kukatula to kuyika kima mosi na kati. Mu mbandu, Biblia yina bo balulaka na 1997 vandaka kusadila ngogo “kulunsi” sambu na kutubila kima yina bo tulaka Yezu na zulu na yo. Kansi Biblia—Mbalula ya Nsi-Ntoto ya Mpa ke sadila ngogo “nti” sambu na kutubila kima yina bo tulaka Yezu na zulu na yo ntangu bo fwaka yandi.

Diambu ya mfunu kele nde kaka na ntangu bo vandaka kubasisa Biblia—Mbalula ya Nsi-Ntoto ya Mpa yina bo ke sadilaka na baapareyi, bo vandaka mpi kukabisa Biblia ya papie na bantu yonso yina vandaka kulanda diskure yango na Banzo ya Kimfumu 23. Konso muntu bakaka Biblia mosi ya papie. Mpangi Jorge González ya Komite ya Filiale ya Chili ke tuba nde: “Ba Mapuche ke ndimaka ve bima ya santu, mu mbandu Ndinga ya Nzambi, kana bo me basisa yo na mutindu yina bo lenda sadila yo na baapareyi (version numérique). Yo yina beto salaka yonso sambu konso muntu kubaka Biblia—Mbalula ya Nsi-Ntoto ya Mpa ya Masonuku ya Kigreki ya Bukristu ya papie na ndinga Mapudungun.”

Beto ke samba sambu Biblia yai kusadisa diaka bantu mingi ya “makanda yonso” na kuzaba Yehowa mpi na kusambila yandi.—Yezaya 2:2.