Na mvula 2022, kisalu ya kulonga nsangu ya mbote yina Bambangi ya Yehowa ya ke zingaka na kisanga ya Chypre yina ke vandaka na nzadi-mungwa ya méditerranée (île méditerranéenne de Chypre) lungisaka bamvula 100 banda bo me yantikaka kisalu yango. Na ntangu ya ntama, ntumwa Polo kwendaka na kisanga yina ti muntu mosi ya me butukaka kuna na nzietelo na yandi ya ntete ya kimisionere. Zina ya muntu yango Barnabasi. Na bilumbu na beto, yo ke monana nde nsangu ya mbote kotaka sambu na mbala ya ntete na Chypre na 1922 ntangu mfumu mosi ya dibundu bakaka kamukanda mosi [Does the Soul Die? (Keti Moyo Ke Fwaka?)]

Bamvula zole na nima, Cyrus Charalambous longoki mosi ya Biblia ya vandaka kuzinga na États-Unis vutukaka na Chypre. Yandi yantikaka kulonga nsangu ya mbote ti kikesa mpi yandi tindaka trakiti Où sont les morts (Bafwa Ke Vandaka na Wapi?) na konso mbanza mpi bwala ya kisanga Chypre.

Antonis Spetsiotes bakaka trakiti yina mosi. Antonis bakisaka nde mambu yina yandi tangaka vandaka kieleka mpi yandi songaka Andreas Christou mambu yango. Andreas vandaka kuzinga pene-pene ti yandi. Babakala yai zole yantikaka kusonga bantu yina vandaka pene-pene ti bo mambu yina bo longukaka.

Nzo-nzambi mosi (Église orthodoxe grecque) kangaka Antonis ti Andreas nzila ya kulonga mambu yina mpi bo kulaka bo na nzo-nzambi. Kansi Antonis ti Andreas yambulaka ve. Na bamvu 1930, kisalu ya kulonga yina bo vandaka kusala salaka nde dibundu ya ntete kukanguka na Chypre na bwala Xylophagou.

Bampangi ya Chypre bakaka lusadisu mingi na kisalu ya kulonga, ntangu Antonios Karandinos kumaka kuna. Yandi vandaka misionere ya ntete na kukuma kuna. Yandi bakaka formasio na nzo-nkanda ya Gileadi. Na 1948, kisanga yina vandaka ti bansamuni 50 mpi bo kangulaka filiale. Na 1960, bampangi zwaka nswa ya kusala bisalu na beto. Bo ke bingaka yo entité juridique. Bamvula zole na nima, bo tungaka Nzo ya Kimfumu ya ntete na Nicosie. Ntalu ya bansamuni vandaka kaka kumata. Ebuna na nima, bo tungaka Betele ya mpa. Yo vandaka Betele ya nene mpi bo yantikaka kusadila yo na 1969.

Kuyela vandaka ya mingi, kansi bo kumaka mpi kutelamina bampangi mingi. Na kati-kati ya bamvu 1960, bo kotisaka batoko ya vandaka Bambangi ya Yehowa mpi ya vandaka kubuya kusala kisalu ya kisoda boloko. Nkutu basoda vandaka kupesa bankaka mpasi na nitu sambu na kupusa bo na kundima kisalu ya kisoda.

Bampasi ya nkaka diaka basikaka na 1974 ntangu bitumba salamaka na kisanga Chypre. Kiteso ya bampangi-babakala mpi bankento 300 tinaka. Bampangi ya dibuta ya Betele mpi katukaka. Bampangi na beto ya ntoto ya mvimba tindilaka bampangi na beto ya Chypre bima sambu na kusadisa bo. Bampangi ya nkaka yina vandaka ti mpila ya kuyamba bampangi yina tinaka bitumba na banzo na bo yambaka bo.

Bitumba yina salaka nde bampangi na beto kuvukana ve kisika mosi sambu na kusambila Yehowa. Ata mpidina, bo landaka kulonga nsangu ya mbote. Na 2006 bampangi salaka lukutakanu ya distrike yina bo ta vilaka ve. Yo vandaka ti ntu-diambu “Luguluku Mefinama.” Bo salaka lukutakanu yango na Limassol. Yo vandaka mbala ya ntete banda 1974 yina Bambangi ya Yehowa vukanaka bo yonso kisika mosi.

Bubu yai, kisanga yina kele ti bansamuni 2 866 ya ke sadilaka Yehowa na mabundu 46 mpi na bimvuka 17 ya ke salaka balukutakanu na bandinga 14. Na 2021, bantu 5 588 vukanaka na Nkinsi ya Kuyibuka Lufwa ya Kristu.

Beto ti bampangi na beto ya babakala mpi ya bankento ya Chypre, beto kele na kiese. Beto me zaba nde Yehowa ta sadisa bo na kulanda kukwenda na nzila yina ya mbote.—Bafilipi 3:16.