Na Lumingu 30 avril 2023, kisalu ya kuyidika nzo mosi ya nene ya Betele ya Corée yina salaka dezia bamvula 30 manaka. Nzo yina vandaka ti kisika yina bantu ke diaka (salle à manger) mpi bashambre 62. Lukanu ya kisalu yai vandaka ya kusala nde nzo yina kusadila ve kura mingi, yo tula ve luzingu ya bampangi na kigonsa mpi yo vanda nzo mosi ya mbote sambu na dibuta ya Betele. Bampangi-babakala mpi bankento 170 kudipesaka na luzolo yonso sambu na kisalu yai. Na kati na bo, bampangi 71 vandaka tii pana bo me salaka ntete ve kisalu ya kutunga banzo ya Kimfumu. Bo bakaka formasio ya mbote kibeni mpi bo manisaka bisalu ya kuyidika Betele yina ya Corée. Bavolontere kuluta 40 fwanaka sambu na kukwenda kusala bisalu ya kutunga na bansi ya nkaka.

Mpangi-nkento Kim Ha-yeon ke tuba nde: “Mono bakaka formasio ya mbote kibeni na kisalu yina ya kuyidika diaka Betele ya Corée. Mono me baka mayele na kisalu yina kuna. Sesepi mono lenda sadila mayele yina na kisalu ya kutunga awa na Indonésie. Yo ke pesa mono kiese mingi kibeni.”

Mpangi-bakala Lee Myong-Hoon salaka mpi kisalu ya kuyidika Betele yina ya Corée. Yandi ke tuba nde: “Kisalu yai me sadisa mono na kuzaba mbote mutindu ya kusala kisalu. Kisalu yango vandaka ve ntangu yonso pete, kansi formasio mpi bantuma ya organizasio na mambu ya lutaninu salaka nde mambu kukuma pete.” Bubu yai, mpangi Lee kele na kiese ya kupesa maboko na kisalu ya kutunga na Philippines.

Beto kele na kiese sambu kisalu ya kuyidika Betele ya Corée me mana. Beto ke pesa bavolontere yonso yina kudipesaka na kisalu yai mersi. Bankaka na kati na bo ke pesa maboko na bisalu ya nkaka ya kutunga ya ke salama na organizasio. Beto kele ti ntonda sambu na ‘kisalu na bo ya kwikama mpi ya ngolo.’—1 Batesalonika 1:3.