Na Mposo 2 avril 2022, mpangi Alberto Rovira ya Komite ya Filiale ya insi Espagne tubilaka kubasika ya Biblia—Mbalula ya Nsi-Ntoto ya Mpa yina bo ke sadilaka na baapareyi na ndinga Catalan. Bambangi ya Yehowa yina ke tubaka ndinga yai na insi Andore mpi na babwala ya nkaka ya Espagne bonso na bisanga ya Baléares (îles Baléares), na Catologne mpi na Valence landaka manaka yai ya sipesiali na nzila ya jw streaming. Bantu kuluta 3 000 landaka manaka yango na nzila ya Internet. Bo ta tindila mabundu Biblia ya papie na ndinga yai na bangonda ya ke kwisa.

Banda na mvu-nkama ya 13, Babiblia ke vandaka na ndinga Catalan. Na kati-kati ya bamvu 1282 mpi 1325, bo basisaka Biblia mosi na ndinga yango mpi Biblia yina vandaka ve bonso Babiblia ya nkaka. Yo ke vutukilaka na bunkufi mikanda 18 ya Biblia. Bo me sonikaka mikanda yango bonso bankunga (rimes) sambu na kusadisa bantu ya ke tanga yo na kukanga mambu yina yo ke tuba na ntu.

Babiblia mingi ya kele na ndinga Catalan ke sadilaka kutuba mosi ya ntama, ya kele mpasi sambu nde bantu ya ke tanga kubakisa. Na Babiblia ya nkaka bo me katulaka zina ya Yehowa, to mpi mambu ya kele na kati kele ve ya siki-siki.

Na manaka yango, mpangi Rovira tendulaka nde: “Beto lenda ndima nde Biblia yai ke vutukila na siki-siki yonso mabanza ya Nzambi na ndinga na beto ya kubutukila.”

Beto kele na kiese sambu bantu yina ke tubaka ndinga Catalan ta baka mambote ya ngolo yina kele na Ndinga ya Nzambi.—Baebreo 4:12.