Na Augusti 14, 2021, kunikana mosi ya ntoto (magnitude 7,2) salamaka na ndambu ya sudi-westi ya Haïti mpi na nima ntoto yantikaka diaka kunikana malembe-malembe. Bo me zaba ntete ve nki kiteso ya bima yina me beba.

• Mawa kibeni, bampangi 2 ya bankento mpi mpangi mosi ya bakala fwaka

• Bampangi-babakala mpi bankento 21 lwalaka

• Banzo 119 bebaka

• Banzo 72 bwaka

• Banzo ya Kimfumu 5 bebaka fioti

• Banzo ya Kimfumu 4 bebaka ngolo

• Komite mosi ya Ke Sadisaka Bampangi Yina Me Bwila Mpasi ke twadisa kisalu yai. Komite yai ke sala na kuwakana ti bankengi ya nziunga zole mpi ti bankuluntu yina kele na teritware yina kisumbula yango salamaka sambu na kusadisa bampangi na kinsuni mpi na kimpeve

• Komite yango ke yidika kisalu ya kukabisila bampangi bima mu mbandu, bilele ya kudifika (couvertures), bilele ya kulwata, madia, bankinsi, ba bashe mpi masa. Bo me yidika mpi mambu sambu bampangi-babakala mpi bankento yina me lwala kubaka lusansu ya minganga

• Bampangi yonso ya ke pesaka maboko na kisalu yai ke zitisa bansiku sambu na kuditanina na maladi ya COVID-19

Ata mambu kele mpasi na teritware yina kunikana ya ntoto me salama, mabundu mingi ya kele kuna salaka lukutakanu ya nsuka ya mposo na nzila ya video (vidéoconférence) na Lumingu, Augusti 15. Bampangi-babakala mpi bankento talaka nkutu manaka ya lukutakanu ya distrike ya Lumingu na suka. Lukutakanu yina ya distrike vandaka ti ntu-diambu “Lukwikilu Ke Kumisaka Beto Ngolo.”

Lufwa ya bampangi na beto yina tatu ke pesa beto mpasi mingi. Beto ke samba sambu na bampangi na beto yina me bwila mpasi yai ya lufwa to bayina me lwala mpi ke niokwama na mabanza sambu na kunikana yai ya ntoto. Beto me zaba nde Yehowa ke mona mpasi na bo mpi yandi ta landa kuvanda kitininu na bo mpi ngolo na bo na ntangu yai ya mpasi.—Nkunga 46:1, 2.