Maladi ya Coronavirus ya me panzana na ntoto ya mvimba me sala nde babiro 11 ya ke salaka kisalu ya kubalula na insi Inde kukutana ti bampasi yina bo me kutanaka ntete ve ti yo. Babiro yai ke salaka kisalu ya kubalula na bandinga 36. Yehowa ke sadisa bampangi yina ke salaka kisalu yai na kununga bampasi yina mpi na kubika ve kisalu na bo.

Sambu na kusala kisalu yai ya kubalula mikanda, yo ke lombaka nde bampangi kusala na kimvuka. Kansi mutindu maladi yai me panzana, bamfumu ya insi Inde me tula nsiku nde bantu kubasika diaka ve. Yo me sala nde bampangi yina ke salaka kisalu ya kubalula kuvukana diaka ve kisika mosi sambu na kisalu na bo. Katula yo, bampangi yonso ya ke salaka kisalu ya kukotisa ndinga ya bavideo yina bantu ke monikaka mpi ya bavideo ti ya mikanda ya kuwidikila lenda vukana ve diaka kisika mosi sambu na kusala kisalu yai na babiro yina bo ke salaka kisalu ya kubalula.

Na babiro yango, na kisika nde bampangi ya ke salaka kisalu ya kubalula kukutana kisika mosi sambu na kusala kisalu, bo ke sala yo na nzila ya video mpi bo ke kotisa ndinga na kintama. Mayele yai me sadisa bampangi ya ke salaka kisalu ya kubalula na kubaka lusadisu ya bampangi-babakala mpi ya bampangi-bankento ya bansi ya nkaka, mu mbandu Bangladesh mpi États-Unis.

Bampangi me zwa mpi mayele ya nkaka ya mbote sambu na kusala bavideo na ndinga ya bidimbu kukonda kuvanda pene-pene ti bampangi ya nkaka. Bampangi ya nkaka ya ke salaka kisalu ya kubalula me kumisa bashambre na bo kisika yina bo ke kotisaka ndinga (studio) mpi bo ke sadila ba-apareyi yina bo kele ti yo na kisika ya bima yina bo ke sadilaka. Mu mbandu, bo ke sadila batelefone na bo na kisika ya bakamera ya mbote mpi bakarto yina bo me yidika bonso bakesi na kisika ya kima yina bo ke sadilaka sambu na kutelemisa mikro.

Katula bima yai ya bo me sala, bampangi yai ya ke salaka kisalu ya kubalula na babiro yina bo ke salaka kisalu yango ke tula ntima na Yehowa sambu bo landa kuvanda ti mabanza ya mbote mpi bo yambula ve kisalu na bo na ntangu yai. Tala mambu yina bankaka na kati na bo me tuba:

Mpangi Jose Francis ya Calcutta ke tuba nde: “Kana bantu kele na ntangu ya mpasi, bo ke monaka kaka mpasi yina, kansi Yehowa ke monaka kima ya kusala sambu mpasi yina kumonana ve.”

Mpangi-nkento Bindu Rani Chandan ke tuba nde: “Mutindu mono ke zaba nde Yehowa ke sadila mono na ntangu yai ya mpasi, yo ke pesa mono kiese ya mingi ata bampasi kele.”

Mpangi-nkento Rubina Patel ke tuba nde: “Ata kima mosi ve lenda kanga Yehowa mpi organizasio na yandi nzila, ata coronavirus lenda kuka ve ata fioti.”

Beto kele na kiese sambu na bampangi na beto yai ya babakala mpi ya bankento ya ke landa kusala na kikesa yonso kisalu yai ya kubalula. Beto ke tula ntima nde mpeve santu ya Yehowa ke sadisa bo na kulanda kusala kisalu na bo mpi nde kaka mpeve santu yina ta sala nde mambu yina Yezu tubaka kulungana: ‘Bo ta longa nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.’—Matayo 24:14.