Na APRILI 4, 2021, mupepe mosi ya ngolo ya bo ke binga Seroja bebisaka bima mingi na Indonésie. Bo salaka bisalu yina sambu na kuyidikila bampangi banzo na bo yina bebaka. Kansi bisalu yai kumisaka mpi ngolo zola ya bampangi mpi yo pusaka bantu mingi ya nkaka ya vandaka kumona yo na kukumisa Yehowa.

Mpangi-nkento Ela Ludjipau, yina ke sansaka yandi mosi bana na yandi mpi yina bo yidikilaka nzo na Komite ya Ke Pesaka Lusadisu na Bantu Yina Me Bwila Mpasi, ke tuba nde: “Ata mono ke zingaka mono mosi ti bana na mono, mono ke kudiwaka ve mono mosi sambu na lusadisu yina bampangi ke landaka kupesa mono.” Yuliana Baunsele, mpangi-nkento ya nkaka, tubaka nde: “Ntangu mono monaka mutindu bampangi kwisaka kusadisa mono nswalu na nima ya ntangu yina mupepe yina ya ngolo katukaka kubula, mono ndimaka kibeni nde Yehowa ke zolaka mono.”

Mpangi-bakala Dicky Thome, yina ke salaka na Komite ya Ke Pesaka Lusadisu na Bantu Yina Me Bwila Mpasi, ke tuba nde: “Yo ke pesa kiese na kumona mutindu Yehowa ke sadisa bampangi yina ke kutana ti bampasi. Beto sepelaka mingi mpenza mutindu bampangi monisaka ntonda sambu na lusadisu yina organizasio pesaka bo. Lukwikilu na beto kumaka ngolo ntangu beto monaka mutindu bampangi vandaka kutula ntima nde Yehowa ta tanina bo mpi ta sadisa bo.”

Bampangi na beto mpamba ve bantu monaka zola yai ya beto vandaka kumonisilana. Mpangi-bakala Marsel Banunaek ke zingaka ti dibuta na yandi na kisika yina bantu ya makanda ya mutindu na mutindu ke zolanaka ve. Bantu yina vandaka kuzinga pene-pene ti bo vandaka kutelemina Bambangi ya Yehowa. Mpangi Banunaek ke tuba nde ntangu bantu yina vandaka kuzinga pene-pene ti bo monaka mutindu bampangi ya makanda ya mutindu na mutindu ke sadisa dibuta na bo, bankaka na kati na bo tubaka nde: “Bambangi ya Yehowa kele ve mutindu beto vandaka kuyindula ntete.” Mpangi Banunaek ke tuba diaka nde: “Bantu yina vandaka kuzinga pene-pene ti beto yitukaka mingi na kumona zola mpi bumosi yina ke vandaka na kati na beto. Diaka, bampangi na beto ya dibuta monaka mpi zola yina bampangi na beto Bambangi ya Yehowa monisilaka beto. Ntangu yai, bo me kumaka kuyula beto bangiufula sambu na mambu ya beto ke kwikilaka. Beto ke pesa mersi mingi sambu na zola ya kimpangi yina ke vandaka na kati beto!”

Yosi Duli Ottu, mfumu mosi ya nkento ya bwala yina, tubaka nde Komite ya Ke Pesaka Lusadisu na Bantu Yina Me Bwila Mpasi “pesaka mbandu ya mbote” sambu bo salaka mambu na ndonga mpi sambu bo zitisaka bansiku ya kuditanina na maladi ya coronavirus. Yandi songaka bampangi ya Komite ya Ke Pesaka Lusadisu na Bantu Yina Me Bwila Mpasi nde: “Mambu yina beno me sala sambu na bampangi na beno me yitukisa mono mingi. Ntangu beno waka nde bo me bwila mpasi yai, beno kwisaka kupesa bo lusadisu nswalu. Beno ke yidikaka mbote bisalu ya kusadisa bantu mpi beno ke vandaka mpenza ti bisadilu ya mbote ya kusadila bisalu yango.”

Bisumbula ya lugangu lenda bebisa bima. Kansi yo lenda bebisa ve ata fioti zola mpi bumosi yina ke vandaka na kati ya Bakristu ya kieleka. Beto kele na kiese ya mingi na kumona mutindu “bisalu . . . ya mbote” ke kumisa ngolo zola na beto ya kimpangi mpi mutindu yo ke “pesa nkembo” na Yehowa!—Matayo 5:16.