Italie kele na kati ya bansi yina bantu mingi kibeni me baka maladi yai ya coronavirus. Na lutwadisu ya Nto-Kimvuka, Betele ya Italie ke lungisa bampusa ya kinsuni ya bampangi na beto ya babakala ti ya bankento mpi ke pesa bo kikesa na nzila ya Biblia.

Bakomite tatu Yina Ke Pesaka Lusadisu na Ntangu ya Bisumbula ke lungisa bampusa ya bampangi na ndambu ya nordi, ya sudi mpi na ndambu ya kati-kati ya Italie. Bakomite yina ke zabaka konso kilumbu bima yina bampangi ke vandaka ti yo mfunu. Bankuluntu ya mabundu ke songaka bankengi ya nziunga bima yina bampangi kele ti na yo mfunu. Na ture na bo, bankengi ya nziunga ke zabisaka bampangi ya ke salaka na bakomite yina bima yina bampangi kele ti yo mfunu.

Katula kusadisa bampangi na kinsuni, bankuluntu ke sadisa mpi bampangi na kulanda kulonga nsangu ya mbote mpi na kuvukana na balukutakanu. Mpangi Villiam Boselli kele nkengi ya nziunga. Yandi ke sadilaka Yehowa pene-pene ya mbanza Milan. Yo kele na kati ya bambanza ya ntete yina bantu mingi bakaka maladi ya coronavirus. Mpangi Villiam Boseli ke tuba nde: “Ata bampangi kele kaka na kati ya banzo na bo, bo yonso ke landa kusolula na kati na bo. Diaka, mutindu bo ke sadila video (vidéoconférence) sambu na kusala balukutakanu, bo ke pesana kikesa mpi bo ke pesa bakomantere na lukutakanu. Yo vanda bampangi-babakala mpi bampangi-bankento yina me kumaka kibeni bambuta ke baka mambote mingi na nzila ya balukutakanu yai ya bo ke sala na nzila ya video. Mono ke mona nkutu nde na ntangu yai, dibundu kele diaka na bumosi ya ngolo kuluta!”

Diaka, bantu mingi ya ke sambilaka ve Yehowa ke landa balukutakanu ti bampangi ya mabuta na bo ya ke sambilaka Yehowa. Mpangi-nkento mosi ke tuba nde: “Ntete bakala na mono vandaka kuzola ve ata fioti kukwenda na balukutakanu kansi ntangu yai, yandi ke landa balukutakanu na kati ya nzo na yandi . . . mpi beno me zaba? Yandi ke sepela ti yo!”

Bampangi-babakala mpi bankento ke sadila mabaku yonso sambu na kulonga nsangu ya mbote. Mu mbandu, mpangi-nkento mosi kwendaka kubikisila mpangi-nkento ya nkaka ya mununu velo ya bikata na kaminio na yandi. Na nzila bamfumu tatu ya bapolisie telemisaka yandi. Mpangi-nkento yango songaka bo nde yandi ke kwenda kusadisa nkento mosi ya mununu mpi yandi songaka bo mukanda yina pesaka yandi nswa ya kukwenda. Yandi pesaka konso mfumu ya bapolisie trakiti Inki Mutindu Nge Ke Monaka Bilumbu Yina Ke Kwisa? mpi trakiti Keti Kilumbu Kele Bampasi Ta Mana? Ntangu mpangi-nkento yina vandaka kuvutuka na nima ya kubika velo yina, bamfumu ya bapolisie telemisaka yandi diaka. Mbala yai, bo pesaka yandi mersi mpi bo lombaka yandi na kusonga bo mambu mingi ya nkaka sambu na kivuvu yina kele na Biblia. Nkutu, bo bingaka bapolisie ya nkaka zole sambu bo mpi bo kwisa kuwa. Mpangi na beto vandaka na kiese ya kusonga bo jw.org. Mfumu mosi ya bapolisie songaka yandi nde: “Mersi mingi mama, nge me sala nde beto vanda na kiese bubu yai!”

Mpangi Boselli ke tuba nde: “Ata mono kele ti mukumba ya kupesa bampangi ya nkaka kikesa, mono bakaka kikesa ntangu mono monaka bampangi na mono ke landa kuvanda pene-pene ya Yehowa mpi ke landa kusambila yandi. Zola na bo sambu na Yehowa kele kibeni ngolo mpi yo ke simba kibeni ntima na mono. Bo kele kibeni dikabu ya mbote yina me katukaka na Yehowa mpi yina beto kele na yo mfunu!”

Yo kele pwelele nde, yo vanda bampangi na beto ke kutana ti mambu ya mpasi, bo ke landa kuvanda pene-pene ya Yehowa mpi ‘mpasi yai ke nikisa bo ve.’—1 Tesalonika 3:2, 3.