Na Kitanu 4 mars 2022, ministere ya ke talaka mambu ya nzo-nkanda na insi Kenya basisaka nsiku mosi. Na nsiku yango, bo ke lomba bantwadisi ya baekole na kutanina nswa yina bana kele ti yo ya kuvanda na konso dibundu yina. Beto ke tula ntima nde nsiku yai ta sadisa na kutanina banswa ya bana ya Bambangi ya Yehowa yina bo ke niokulaka sambu na mambu ya dibundu banda bamvula mingi.

Banda na 2015, bo me katulaka bana 36 ya Bambangi ya Yehowa na baekole to bo me zengilaka bo ntalu ya bilumbu yina bo fwete kwenda ve na nzo-nkanda sambu bo buyaka kukota na mambu ya me tala lusambu yina bo vandaka kusala na baekole na bo. Na 2018, mimonisi ya filiale ya Bambangi ya Yehowa ya Nairobi kutanaka ti bamfumu ya ke talaka mambu ya nzo-nkanda sambu bo lomba bo na kumanisa mambu ya kuniokula bana ya Bambangi ya Yehowa sambu na mambu ya lusambu. Mu mbandu na 23 octobre 2018, mimonisi yina kutanaka ti Amina Mohamed yina vandaka ministre ya ke talaka mambu ya nzo-nkanda na ntangu yina.

Nsiku yina luyalu basisaka ke ndima na pwelele yonso nde “bantwadisi mpi badirektere ya baekole” na Kenya “ke pesa bikuma ya me fwana ve sambu na kukanga bana ya nzo-nkanda nzila ya kutanga.” Nsiku yina ke monisa nde “baekole ke fwa nswa yina bana ya nkaka ya nzo-nkanda kele ti yo ya kuvanda na dibundu yina bo me zola mpi bo ke tuba nde mutindu bo kele na mabundu yina, bo lenda sonikisa bo ve na baekole na bo to mpi bo lenda katula bo.”

Bo tubilaka mingi nsiku yai na bansangu na insi Kenya. Nsiku yango ke monisa diaka nde “kukonda kuzitisa nswa ya muntu na mambu ya dibundu ke fwa nsiku ya insi mpi bakuwakana yina bansi ya nziunga mpi ya ntoto ya mvimba me salaka mpi mingi-mingi, yo ke fwa Bansiku Yina Ke Twadisaka Insi Kenya.” Yo yina, bana ya Bambangi ya Yehowa mpi bana ya nkaka kele ti nswa ya kubuya kusala “konso kima yina ke wakana ve ti dibundu na bo.” Na nsuka ya nsiku yango, bo ke lomba bantwadisi ya baekole na kuzitisa nswa ya bana ya nzo-nkanda na mambu ya dibundu na baekole na bo.

Mpangi-nkento Kimberly Nyang’ate kele ti bamvula 17. Yandi ke zingaka na Nairobi. Yandi ke tuba nde: “Bo bingisaka bibuti na mono na ekole mbala kuluta tanu sambu mono buyaka kusala bankinsi ya dibundu. Mono kele na kiese sambu nsiku yai ke sadisa beto na kunwanina kukonda mpasi mambu ya beto ke kwikilaka ya kele na Biblia.”

Beto ke pesa luyalu ya insi Kenya mersi mutindu bo me basisa nsiku yai. Yo ta sadisa bana ya Bambangi ya Yehowa ya insi yina na kulanda kukangama ngolo na lukwikilu na bo.—1 Bakorinto 15:58.