Na Lumingu 5 juin 2022, Biblia​—Mbalula ya Nsi-Ntoto ya Mpa ya Masonuku ya Kigreki ya Bukristu basikaka na ndinga Iban. Bampangi mingi ya babakala mpi ya bankento vukanaka na Banzo ya Kimfumu sambu na kulanda na nzila ya video diskure yina bo kotisaka dezia ndinga. Bampangi ya nkaka landaka yo na nzila ya video kaka na ntangu yo vandaka kusalama. Babiblia ya bapapie ta basika na juillet to na août 2022.

Ntangu ekipe ya bampangi ya ke salaka kisalu ya kubalula mikanda mpi bavideo na ndinga Iban vandaka kubalula Biblia yai, yo lombaka nde bo tadila mbote-mbote mutindu bantu ke tubaka ndinga yai na bisika ya kuswaswana. Bampangi ya bisika ya mutindu na mutindu tangaka ntete Biblia yai mpi bo sadisaka bampangi ya vandaka kubalula yo na kubalula yo na mutindu yina bantu mingi ya ke tubaka ndinga Iban lenda bakisa yo.

Biblia yai ya mpa ta sadisa mpi bansamuni na kutendula mbote-mbote malongi ya Biblia. Mu mbandu na bamvula me luta, bansamuni vandaka na mpasi sambu na kutendula Yoane 4:24 yina ke tubaka na kitini na yo mosi nde: “Bantu yina ke sambila [Nzambi] fwete sambila yandi na mpeve mpi na kieleka.” Kansi Babiblia ya ntama ya ndinga Iban vandaka kubalula ve mbote ngogo “mpeve.” Bo vandaka kusadila bangogo “mpeve ya bafwa” na kisika ya ngogo “mpeve”. Diambu yai salaka nde yo vandaka mpasi sambu na bantu ya ke sepelaka ti kieleka kubakisa mutindu bo fwete sambila Nzambi.

Mpangi mosi ya pesaka mpi maboko na kisalu ya kubalula Biblia yai ke tuba mambu yai sambu na kumonisa mfunu ya Biblia yai ya mpa: “Kuvanda ti Biblia—Mbalula ya Nsi-Ntoto ya Mpa ya Masonuku ya Kigreki ya Bukristu na ndinga na beto ke monisa pwelele nde Yehowa ke zolaka bantu yonso mingi.”

Beto ke samba sambu Biblia yai ya mpa kusadisa bantu mingi yina ke tubaka ndinga Iban na kubakisa mbote-mbote malongi ya Biblia, na kupusana pene-pene na Nzambi mpi na kupesa lukumu na zina na yandi.—Nkunga 117:1.