Na Lumingu 24 avril 2022, mpangi Frank Madsen ya Komite ya Filiale ya Malawi salaka diskure ya kubasika ya Biblia—Mbalula ya Nsi-Ntoto ya Mpa ya Masonuku ya Kigreki ya Bukristu na Ndinga Chiyao ya bo lenda tanga na baapareyi (version électronique). Bampangi kuluta 148 000 landaka diskure yango na nzila ya televizio (télévision par satellite) mpi na mitindu ya nkaka bonso na JW Box mpi JW Stream. Babiblia ya bapapie ta basika na bilumbu ke kwisa.

Bo basisaka Biblia ya mvimba na ndinga ya Chiyao na 2014. Kansi na bisika ya nkaka ya Biblia yango, bantu yina balulaka yo katulaka mpi yikaka bima ya nkaka, mu mbandu bo katulaka zina ya Nzambi Yehowa ata yo kele bambala mingi kibeni na bandinga ya kisina.

Yo yina, bansamuni mingi vandaka na mpasi ya kusadila Biblia yai na kisalu ya kulonga nsangu ya mbote. Mpangi mosi ya ke salaka kisalu ya kubalula mikanda mpi bavideo tubaka nde: “Beto vandaka kulutisa ntangu mingi sambu na kutendudila bantu sambu na nki zina ya Nzambi vandaka ve na Biblia yango na kisika ya kulonga bo mfunu ya zina yango. Mu mbandu, Biblia mosi na ndinga Chiyao ke balulaka kitini ya Matayo 22:44 nde “Mfumu Nzambi tubilaka Mfumu na mono.” Kansi, Biblia—Mbalula ya Nsi-Ntoto ya Mpa ke balulaka yo mbote kibeni nde “Yehowa tubilaka Mfumu na mono.”

Mpangi ya ke salaka mpi kisalu ya kubalula mikanda mpi bavideo tubaka mambu yai ntangu yandi yindulaka mambote ya nkaka ya Biblia yai ya mpa: “Sambu bo me balula Biblia—Mbalula ya Nsi-Ntoto ya Mpa ya Masonuku ya Kigreki ya Bukristu na ndinga Chiyao na mutindu ya pwelele mpi ya pete na kubakisa, bantu ta bakisaka nswalu mambu yina yo ke tubaka mpi na kusadila mambu yina bo ke longuka.”

Beto kele na kiese mutindu Biblia me basika na ndinga Chiyao. Yo ta sadisa bamilio ya bantu ya ke tubaka ndinga yai na kuzaba zina ya Yehowa, “Muntu ya Kuluta Zulu na ntoto ya mvimba” mpi na kukuma banduku na yandi.—Nkunga 83:18.